May ni 1 a Chief Minister Pu Lal Thanhawla’n Planning Commission Deputy Chairman hnena Mizoram mamawh thil hrang hrang a thlen zingah watershed management chungchanga Mizoram harsatna a thlen bawhzuiin vawiin khan Planning Commission hnuaia National Rainfed Area Authority atangin Dr.J.S. Samra CEO leh Dr.Alok K. Sikka, Technical Expert (Watershed Development)te chuan Mizoram an rawn thleng a. NLUP Implementing Board conference hall-ah sorkar department pawimawh te nen watershed management chungchanga hma lak dan tur an sawiho nghal a ni.

Meeting hi State Planning Board Member & Secretary Pu P.L.Thanga’n kaihruaiin thlai hrang hrang chinna hmun zau zawng leh an ram khuh chin te a sawifiah a. Ruahtui leh tuihna dang te atanga tui khawl khawm leh enkawlna kawnga sorkar hma lak mek tawhte tarlangin thlai hrang hrang chawmna atana tui khawl khawm uar zawka kalpui leh tura hmabak awm te a sawi a. NLUP leh IWMP hnuaia hmalakna te nen tui khawl khawm leh enkawl hna kalpui dan tur zau taka sawihona neih a ni.