407/2023-2024
Thlipui leh ruahpui lo thleng thei laka mipui te fimkhur turin Disaster Management & Rehabilitation Department chuan a hnuai ami angin mipuite a ngen.
India Meteorological Department, Regional Meteorological Centre, Guwahati-in hriattirna a tih chhuah danin May ni 13 leh ni 14 ah te hian Mizoram-ah ruah nasa tak sur tura hmuh lawk a ni a. Tin, May ni 14 ah hian thlipui na tak rawn thawk thut thei a ni bawk a. Thli leh ruahpui-in chhiatna a thlen theih laka kan him theih nan mitin te fimkhur turin kan inngen a. Heng te hi zawm theuh turin mipuite ngen kan ni e :
1. Mahni in leh a velah thliin a tih chhiat mai theih te lo thawm that vek tur a ni a. Kawngka leh tukverh zawng zawng nghet taka kalh theih tura siam vek tur a ni. In chung leh bang te, ran in / ek in chung leh bang te kilh that / tawn that vek tur a ni bawk. Pawnah leh inchungah thliin a chhem sawn theihin engmah dah loh tur a ni a, tha taka delh beh emaw tawn beh / kilh beh vek tur a ni.
2. Kan in bul velah thlipuiin a chhem tliah mai theih thing kung leh thing zar a awm em tih enfiah vek tur a ni a, chutiang a awm a nih chuan a theih anga lo thenfai lawk vek tur a ni.
3. Thlipui a lo tleh a nih pawhin chi-ai mai loh tur a ni a, thli tleh zawh hma chuan pawnah chhuah miah loh tur a ni. Chhiatna a thleng a nih chuan min bialtu Sawrkar thuneitute hrilh vat tur a ni.
4. Ram lama hna thawk mi tan kan awmna buk / thlam thawm that vek tur a ni a. Thli tleh laiin thing kung hnaihah awm miah loh tur a ni.
