UD&PA Minister Pu Zodintluanga chuan tunhnaia ruahsur in a bial chhunga chhiatna hrang hrang a thlen te chu vawiin khan a hmunah kal in a enfiah a ni.

Thorang bialtu MLA chuan Phairuangkaiah a enfiah hmasa ber a, thil thleng chu pawi a tih thu leh chhiat tawk chhungte a tawrhpui thu a sawi a. Sawrkar pawhin dan a neih hmangin a tul anga chhawmdawlna a pek tur thu a sawi a ni. Phairuangkai Branch YMA hnenah mamawha hman turin cheng 30,000/- a pe bawk a ni.

Phairuangkaiah hian leimin avangin in pahnih a chim a. Pu C. Taia (L) in atangin bungrua tlem azawng an thiarchhuak hman a, thi leh hliam erawh an awm lo a ni. Pi Nila Moni in chu kopang minin a hnawl a, mi 6 leh a tunu ruang an menpui te chu a hnawl a ni. Heng zinga mi 3 te chu Lunglei District Hospital-ah admit tawh an ni a, ruang pakhat chu nimin khan phum nghalin, vawiin chhun thleng khan an lumen lai naupang ruang leh Pu Dari leh Pu Botro te chu hmuh an la ni lo a ni. Lungsen, Chhumkhum, Hauruang, Rangte, Pachang, Belthei, Under Manik, Putlungasih leh Kauchhuah atangte in ruang zawng turin mi thahnem tak an hnatlang a ni.

Bialtu MLA Pu Zodintluanga hian kawng a tlang chuan Bolia, Zawlpui leh Changpui te a tlawh chhunzawm leh dawn a ni.