Vawiin chawhma dar 9:30 khan Disaster Management & Rehabilitation (DM&R) Branch, Saiha buatsaihin DC's Conference Hall Saiha-ah ni thum chhung awh tur 'School Safety Training' chu Disaster Management Nodal Officer leh Election Officer nibawk Pu H. Lalhmingthanga'n a hawng. Hawnna inkhawm hi Pu Laldinpuia, District Field Officer, Disaster Management & Rehabilitation chuan a kaihruai a ni.

School Disaster Management Plan (chhiatrupna lo thleng thei laka School inruahmanna) chungchang thupuia hmangin inchhung/school chhung bungraw tla mai thei laka inven dan te, chhiatna lo thlen thulha tih tur leh tih loh tur te, Mizorama chhiatna hrang hrang lo thleng thei te leh chumia First Aid pek dan te, chhiatna a lo thlen thut huna chhanchhuahna neih dan turte an zirho a ni. He Training hi District chhunga Master Trainer-te leh District Field Officer ten Practical leh Power Point Presentation te hmangin an entir a ni. Vawiin training ah hian Saiha District chhunga School hrang hrang Primary atanga Higher Secondary School te atangin zirtirtu 70 an tel a, zirtirtu 30 vel chu Saiha khaw pawn lam atanga tel an ni.

He Training hi India sorkar UNDP Disaster Risk Reduction Programme kalpui mek hnuaia neih a ni a. Mizoramah pawh District pathum Aizawl, Lunglei leh Saiha ah te chhiatna lo thleng theite tuar nep theih nan hmalak tan mek a ni.