NH-54 huam chhung, Thuampui - Tuirial inkar kawng siamtha tura Contract Agreement ziah atanga kum khat dawn hnuah pawh hna thawk tura thlanin awmze neia a thawh theih tak loh avang, PWD chuan November 1, 2017 khan he hna thawk tur hian Contractor thar Bhavya Construction, Silchar chu a ruat fel ta a. Thawk tura ziahfel anih hma atangin he contractor thar hian engkim ruahmanin tunah chuan kawng blacktop nana hmanraw tul zawng zawng : Alkatra & rawra chawhpawlhna khawl (Hotmix plant), hrutmamna khawl (paver finisher), kawng chilmamna khawl (road roller), alkatra kahchikna khawl (bitumen sprayer), vaivut chhemfaina khawl (air compressor), rawra leh alkatra bakah tul dang a ruahmanin a chhekkhawl fel vek tawh a. Rawra hi Silchar atang veka rawn phurh chhoh tur a ni nghe nghe a ni.

November 6, 2017 tlai lam khan bialtu E.E leh SDO hovin Traffic Police, Local Council leh YMA hotute nen ruahmanna siam hovin, November 7, 2017 atanga enchhinin, harsatna dang a awm loh a khua a that chuan thawk chhunzawm zelin, a rang thei ang bera Thuampui leh Zembawk khaw chhung zawh tum a ni a. Tun thal chhung ngeia Tuirial bul thlenga zo turin ruahmanna siam mek a ni bawk. Amaherawhchu, Bawngkawn atanga Zuangtui peng vel inkar SIPMIU lamin tui pipe phum an tum avangin, an phum zawh hma chuan helai hi chu thawh zawh theih a ni hrih lovang.

Harsatna hrang hrang vanga tum leh beisei anga an siam that lawk theih loh chhunga harsatana tuartute chungah PWD chuan ngaihdam a dil a. Contractor-in hna tluang leh tha taka a thawh theih nan hna thawktute tibuai lova, enkawltute leh traffic police lam thu awi taka tawiawm turin mipui mimir leh kawng hmangtute an ngen a. Contractor hna duhthusamlo a awm chuan mahni thu a hma lo la mai lovin, a bialtu PWD hotute hnenah thlen thin turin mipuite ngen an ni e.