Assam Rifles in Dardar Vallabhai Patel-a piancham pual a inpumkhatna hmalakna pek pakhat,  ram pathum tlawh kuala zin mek Bike 19 te chuan nizan khan Champhai an lo thleng a.  Zokhawthar kal tlanga Myanmar ram tlawh turte hi Champhai DC Pu Vanlalngaihsaka chuan tunkin zing khan Champhai Darthlalang Tlangah a vailiam.

Ram pathum tlawh kual tura zin mek (team)te thlahna hun,  tukin zinga neihah hian Mizoram Police, National Cadet Corps,  Ex-Servicemen,  Champhai Sub-Hqrs. YMA hruaitute,  zirlai naupangte leh thuthar thehdarhtute an kal khawm a.  Champhai DC Pu Vanlalngaihsaka chuan India ram hruaitu ropui Sardar Vallabhai Patel hriat rengna atana Assam Rifles te hmalakna chu ropui atih thu sawiin,  hemi puala ram pathum tlawh chhuaka zin hian India tan Bangladesh leh Myanmar ramte nen inlaichinna tha leh zual a hrin chhuah ngei a beisei thu a sawi bakah he Rally hi tluang taka kal turin duhsakna a hlan bawk. 

He Rally hi Shillong atangin October 30, 2017 khan neih tan niin,  Bangladesh an tlawh hnuah Tripura State kal tlangin,  Mizoram an lut a.  Vawiin khan Champhai atangin Indo-Myanmar Border Trade Point Zokhawthar kal tlangin Myanmar ram an lut a.  Myanmar sorkar hotu lam pawhin Rihkhawdar-ah ropui takin an lo dawngsawng a.  Rally hi Tahan kal tlangin,  Indo-Myanmar Border Trade Point (Tamu-Moreh)-ah Manipur an lut anga,  Manipur, Nagaland,  Arunachal Pradesh leh Assam tawlhin an kal leh dawn a ni.  Ni 19 chhung awh tur he Tri-nation Rally hi India ram chhung bakah thenawm ram pahnih (Bangladesh leh Myanmar) te nen inlaichinna tha leh thuk zawk a awm zel theihna tura tih a ni.