Aizawl District huamchhunga kawngpuite chu hmun tam takah a chhiain, lirthei kal velin kawng tam takah harsatna an tawk mek a, kawngpuite hi dimdawi zawka hman a nih lo chuan nitin eibar leh chakkhai lakna kawngah harsatna thui zawk tawk theih a ni a.
Tunah hian PWD, Govt. of Mizoram chuan NH-6 Seling-to-Champhai kawng hi an chei tha dawn mek a. He kawng hi Aizawl District leh Champhai District huamchhung chin khaw thenkhata mipuiten nitin ei leh bar mamawh an chawk luhna kawngpui a ni a. Kumin 17th - 19th October, 2017 hian Champhai, Zotlang-ah YMA General Conference nghah a nih dawn bawk avangin he kawng chei that hna tluang taka thawh a nih nan leh mipuite chhiatna lian zawk thleng thei laka an lo him nan District Magistrate, Aizawl District, Aizawl chuan vawiin khan hetiang hian mipuite zawm tur Thupek a chhuah a ni :
Seling-to-Saitual NH-6 kawngpuiah hian motor lian ke paruk (6) aia tam nei tlan khap tlat a ni. Hei hian nitin ei leh bar (essential commodities) phur, passenger phur bus leh dan leh thupek leh ran venhim hna thawktute a huam lovang.
He khapna thupek hian date 21st September, 2017 atanga thla hnih (2) chhung a huam ang. Thupek bawhchhia chu IPC Section 188 hmanga hrem an ni ang.
