Vawiin khan Convention Centre, Lunglei-ah Science Teachers’ Association of Mizoram leh Lunglei District RMSA tangkawp chuan District Level Children Science Congress 2017 an buatsaih a.  Pu Lalramthianghlima Lunglei District DEO leh DPC RMSA Mission ni bawk chuan a hmanpui. 

Vawiin programme Pu PC Lallawmzuala, Lunglei District RMSA Dy DPC kaihhruaiah hian Pu Lalramthianghlima chuan hawnna thuchah sawiin zirlai kalkhawmte chu thahnem ngai tak leh tum mumal tak neia lehkha an zir a tul a ni, a ti a. District Level Science Congress- ah zirlai team 10 zet an tel thei chu lawmawm a tih thu sawiin Pu Lalramthianghlima chuan zirlaite chu exam chhanna atan chauh an thil zirte hmang lova, an thiamna te a taka hman tangkai dan ngaihtuah thin turin a chah a. Science lama naupangte thiamna ti hmasawn zel turin laboratory lam hmanrua sawrkarin school hrang hranga a semchhuah te chu tun aia tangkaia hman tul a tih thu a sawi bawk. 

Pu F. Lalhmangaihthanga, District Coordinator, Children Science Congress pawhin thu tawi sawiin he programme huaihawt tura an inpuahchah dan tlangpui kalkhawmte a hrilh a. Kum 2013 atanga Children Science Congress neih thin a nih atangin kum tin National Level inelna ah Lunglei District zirlaite an tel pha tih a tarlang bawk. 

Children Science Congress-ah hian Lunglei District chhunga school panga (5) atanga team sawm (10) telin “Science, Technology and Innovation for Sustainable Development” tih thupui hmangin an thil zirte sawifiahna hun hmangin an inel a ni. He intihsiakna endiktute chu Pu Lalrammuana Chawngthu HOD Geography Department, Lunglei Government College leh Pu R. Lalrochama, Associate Professor, Zoology Department, Lunglei Government College-te an ni. 

Vawiin intihsiakna ah hian Baptist Higher Secondary School (BHSS), Serkawn zirlaite chuan pakhatna leh pahnihna dinhmun hauhin Z. Rosanga High School, Leite chu pathumna an ni.