Hrangturzo bialtu MLA Pi Vanlalawmpuii Chawngthu chu vawiin chawhnu khan Raj Bhavan Multipurpose Hall-ah Minister of State atan lakluh a ni a. Governor Lt. Gen. Nirbhay Sharma chuan rinawmna thu tiam tirin a lalut a ni. 

November Ni 25, 2013-a Mizoram Legislative Assembly inthlanpuiah khan MPCC President leh Chief Minister Pu Lal Thanhawla chu Serchhip (ST) leh Hrangturzo (ST) Assembly Constituency-ah te thlan tlin a ni a. Hrangturzo bial a chhuahsan tak avangin April Ni 11, 2014 khan Hrangturzo Assembly Constituency-ah by-election neih a ni. Pi Vanlalawmpuii Chawngthu hian a khingpui awmchhun chu hnehin May Ni 16, 2014 khan tling a puan a ni. Kum 1987 hnua Mizo hmeichhe MLA hmasa ber leh Mizoram Legislative Assembly 7-na a hmeichhe awm chhun ni turin Speaker Pu Hiphei chuan May Ni 20, 2014 khan rinawmna thu tiam tirin a lalut a ni. Pi Lalhlimpuii Hmar (1987) dawta Mizo hmeichhe Minister hmasa ber a ni bawk. 

Pi Vanlalawmpuii Chawngthu hi Minister hlui Pu C. Chawngkunga leh Pi Lalliankimi Sailo te fanu niin, zirna lamah MA (Political Science) thleng a zir a. Tunah Mizoram State Commission for Women Chairperson niin, Mizoram Pradesh Youth Congress Committee (MPYCC)-ah president nihna a chelh mek bawk a ni. 

September Ni 20, 2017 (Nilaini) khan Aizawl South-III bialtu Pu K.S. Thanga chu Minister of State atan lakluh a lo ni tawh a. Pi Vanlalawmpuii Chawngthu nen hian Council of Minister 12 an awm mek a ni.