Vawiin ni 23rd May 2014 hian I&PR Conference Hall, Mamit-ah Mizoram Journalist Association, Mamit District buatsaihin thuthar thehdarhtute tan Media Workshop buatsaih a ni a, He hun hi Pu Jim K. Chozah, Director, I&PR in khuallian niin a hmanpui.

Hawnna thusawiin khuallian Pu Jim K. Chozah Director I&PR chuan Mamit District a thuthar thehdarhtuten hmasawn duhna avanga sawrkar ruahmanna tel lova Media Workshop an buatsaih chu a ropuiin a lawmawm takzet a ni a ti a, Media khawvela awm kan nih angin Media kalphung hrelova awm hi thil hlauhawm tak a ni tiin hemi hriatna kawngah hian taimak kan chhuah a tul a ni a ti bawk. Thuthar thehdarhtute mawhphurhna tarlangin mipuiten kan vela thil thleng leh awmte hman tangkai dan leh harsatna thleng thei laka lo in ven dan hrilhhriatte hi kan bat a ni tiin kan thuziakah innghirngho na lam ni lova inpumkhatna lam hawia fimkhur taka thuziak thin turin kalkhawmte a chah bawk.

Pu Jim-a chuan thuthar thehdarhtute chu mipui aiawha ding kan ni tih hria a, rintlak nun kan neih a tul a, dikna, rinawmna leh taimakna nena an hna thawk theuh turin duhsakna a hlan bawk.

Pu Jim K. Chozah Director I&PR hian MJA Mamit hnenah tanpuina sum a hlan bawk.

He Media Workshop Pu R. Lalmuanpuia President MJA Mamit kaihhruaiah hian Pu Lalsiama Fambawl, MIS, Deputy Director (Rtd) in Practising Journalism tih thupui hmangin paper a buatsaih leh Pi Julie Lalrinzami Judicial Magistrade, Mamit buatsaih, Media Rights and Duties tih thupui hmanga Paper a buatsaih zirho a ni a, sawihona hun buatsaih a ni bawk.

He Media Workshop hi MJA General Hqrs Aizawl atangin Pu R. Lalhmangaihzuala Tresurer, Pu C. Lalhmachhuana Secretary(Publicity) leh Lalremsiama Secretary(Protocol) ten an rawn hmanpui.

Media Workshop-ah hian Mamit District chhunga MJA members te bakah Mamit khawpui chhunga tlawmngai pawl chanchinbu enkawltute leh kohhran chanchinbu enkawltute an tel a ni.

Attachment

  • Loading attachment...