Nimin khan Circuit House, Tlabung (Dimagiri), Lunglei District-ah Border Security Force (BSF) leh Border Guard Bangladesh (BGB) hotuten ‘Border Coordination Conference’ an nei a. BSF aiawhin an hotupa Pu U.M.Subramani, DIG BSF Sector Mizoram leh BGB aiawhin Col. Nurul Huda, Sector Commander, BGB Sector Rangamati bakah ramria venhim hna thawk mek BSF leh BGB officer-te engemawzat he Conference-ah an tel a ni.

He Border Coordination Conference-ah hian thawhhona leh inhriatthiam tawnna tha zawk nei thei dan tur an sawiho bakah hel pawlten mi an rukbo thin chungchangte, Bangladesh lama bu khuar thin helpawl te laka chetlak dan tur te, dan anga phalna nei lova ramri kan thin chungchangte, ramri ven hna thawhdun (joint patrolling) neih dan tur leh ramri chhinchhiahna ban (boundary pillar) phunna hmun tur chungchangte an sawiho a ni. BSF leh BGB inkara inunauna tha zawk awm theihna turin an pawl 2 inkarah infiamna lamah intihsiakna buatsaih an tum bawk.BSF leh BGB hotu kalkhawmte tan zanriah buatsaih a nih bakah Nunsuri khaw miten hnam lam leh zai chi hrang hrang an entir a. Thawhhona tha tak neih chhunzawm zel a, ramri leh a chhehvel khuaah te boruak muanawm tak awm zel theihna turin theihtawp chhuah tura duhsakna inhlanin Conference hi tihtawp a ni.