Tlabunga India Independence Day vawi 67-na lawmna hun, Lichenga buatsaih hmanpuitu AH & Vety minister Pu Nihar Kanti Chakma chuan, "Kan ramin zalenna tluantling, inpumkhatna leh inunauna tha tak nei turin kan inpêk thar leh a ngai a ni," a ti.

Vawiin chawhma dar 10-a parade contingent 4-te chibai bûk a chhânlêt zawha thu a sawinaah khuallian Pu Nihara chuan, "Sorkar-in mi retheite khâichhuahna tura flagship programme a kalpui mek NLUP vangin nasa takin ei leh bârah hma kan sâwn a ni," a ti a, Tlabungah NLUP tanpuina dawngtu chhungkaw 2706 an awm tawh tih sawiin, Tlabungah NLUP rahchhuah hmuh theiha a langchhuak mek chu lâwmawm a tih thu a sawi.

PMGSY hnuaiah thingtlanga lama inkalpawhna kawng sial that mek a ni a, Lunglei - Tlabung - kawrpuichhuah kawng, km 112-a thui pawh sial that hna thawh thuai tum a nih thu, AH & Vety minister chuan a sawi a; cheng nuai 53 sêngin Tlabungah RKVY scheme hnuaiah Market shed sak thuai tum a nih thu a sawi a, hei bakah hian Tlabung Water Supply Scheme hna thawh mek chu 46% thawh zawh tawh a nih thu a sawi bawk.

Licheng filed-a India Independence Day lawmna hun hman zawhah hian, Tlabunga damdawi in pahnih - Civil Hospital leh Leprosy hospital-a dam lo te hnenah khuallian hian Independence Day thilpêk a hlân a, hemi hnu-ah hian Tourist Lodge-ah sâwm bikte pualin thingpui ruai a buatsaihsak bawk a ni.

Vawiina Tlabunga India Independence Day lawmnaah hian, Tlabunga Sorkar department hrang hranga officer-te bakah, mipui thahnem takin a hmunah he hun hi an chhim a ni.