Vawiin Independence Day vawi 67-na lawmna chu Lunglei-ah Thuamluaia Mualah hman a ni a, Sports Minister Pu Zodintluanga chu Khuallian niin zing dar 10:00AM-ah hnampuanzar a pawtparh a, Independence Day lawmna March Past Contingent 22 te chibai bukna a chhang let a ni.

Independence Day 2013 puala thu sawiin Khuallian Pu Zodintluanga chuan ramin zalenna a neih champha phak vawi 66-naah hian hmasawnna tam tak a tawng chho mek zel a, India hmarchhak kilkhawra awm Mizoram pawh hmasawnna hnathawhin a hrut ve mek a ni, a ti. Sorkarin hmasawnna hna a thawh thenkhatte tarlangin Khuallian chuan tlangram lo neih bansan a nih theih nana NLUP hmanga hmalakna chuan Zoram dung tluan a tuam mek zel a, kum 5 chhunga beneficiary 1,20,000 tuam tum chu kum 3 chhungin tuam zawh hman a ni a; a thar mi 15,000 tuam lehna tur pawh Planning Commission-ah thehluh ni tawhin 4th Phase-a sem tur Cheng vaibelchhe 50 chu kumina hmuh belh beisei a ni, a ti. NLUP avangin Mizoram dehchhuah (Gross State Domestic Product) chu 11% in a pung a, hei hi rampum dehchhuah 7.8% aiin a sang zawk a ni tih a tarlang bawk. Mizoramah kawngpui siam hna te, thing leh mau humhalh te, kawlphetha siamchhuah, khawpui cheithat, hriselna lam, zirna leh IT bakah thalaite hmakhua ngaia hmalakna tam tak a awm thu sawiin Pu Zodintluanga chuan Mizoramah boruak muanawm tak kan neih avangin Mizo mipuite kan vannei hle a, he boruak tha hi state dangte pawhin an awh em em a tling a ni, a ti.

Independence Day 2013-ah mipuite hnenah ram leh hnam hmasawn zelna atan inhlan thar a pawimawh a ni tiin sorkar hnathawkte chu mipuite tana chhawrnahawm turin sorkar programme hrang hrang kalpui turin leh roreltute pawh taima taka ro rel zel a pawimawh a ni, a ti. Lunglei-a Thuamluaia Mual chu astro-turf phahchuah vek a ni tawh a, kumin chhung ngeia a hungna (fencing) tih theihna turin hmalak mek a nih thu Khuallian hian a sawi bawk a ni.

Independence Day 2013 puala infiamna chi hrang hrang - football, karate, snooker, volleyball, table tennis leh carromboard - inelnaa lawmman te chu Khuallian Pu Zodintluanga leh amah tawiawmtu a nupui Pi Lalrengpuii ten an sem nghal bawk a ni.

Independence Day lawmna neih zawhah Khuallian chuan he Ni puala Lunglei Photographers' Association ten Art & Culture Auditorium-a 'Photo Exhibition' an neih chu a hawng nghal a ni. Independence Day 2013 puala sawmbikte tan Lunglei DC Pu V.Sapchhunga chuan DC Bunglow kawta thingpui ruai 'At Home' a buatsaihah sorkar officials bakah kohhran zirna in leh tlawmngai pawl aiawhte an kan thahnem hle a ni.

Vawiin tlai vek hian Independence Day 2013 leh vawiina Khuallian Pu Zodintluanga pual hian Lunglei DC chuan Tourist Lodge, Zotlang-ah sawmbikte tan zanriah a buatsaih a ni.