Independence Day vawi 70-na chu Tlabungah pawh vawiin chawhma dar 10:00 khan ropui taka lawm a ni a, Parliamentary Secretary Pu Joseph Lalhimpuia chu Khuallian a ni.

Joseph Lalhimpuia chuan Licheng muala parade contingent 11-te hnam puanzar chibai bûk a chhanglet a, zalenna lawm tura mipui kalkhawmte duhsakna hlanin, British awpna laka India a zalen theihna tura nunna hlantute hre reng turin a chah a ni.

Parliamentary Secretary chuan Tlabung chu Mizoram khaw pawimawh hmasa a nih thu leh, chanchin tha hrilna hmun pawimawh hmasa a nih thu a sawi a, Lunglei leh Tlabung inkar kawng chu Mizorama kawngpui hmasa ber, kum 1889-a vai len vawi hnihnaa British-ho kawng sial a ni, a ti.

Commerce and Industries changtu Parliamentary Secretary chuan India leh Bangladesh insumdawn tawnna hmunpui atan Tlabung buatsaih mek a nih thu a sawi a. Kum 2005-a bul tan Kawrpuichhuah Integrated Check Post atana ruahmanna chu sorkar laipuiin kum 2015 kumtira a hnâwl hnu-ah, Chief Minister Pu Lal Thanhawla'n chak taka a nawr avangin hma lak leh tan mek a nih thu a sawi a, he ruahmanna tihlawhtling tura sorkar-in theihtawp chhuah zel a tum thu a sawi. Tlabung leh Kawrpuichhuah inkalpawhna kawng pawh cheng vaibelchhe 77 chuang senga sial that tur a nih thu Khuallian chuan a sawi a. Tlabung kaltlanga ram pahnihte insumdawn tawnna a taka kalpui a nih hunah chuan Mizoram tan Tlabung chu kawtchhuah pawimawh tak a la ni dawn a ni, a ti.

Tlabung leh Lunglei inkalpawhna kawngpui thawm that a nih theih na'n, Union Minister for Roads, Transport & Highway Pu Nitin Gadkari hnena Chief Minister Pu Lal Thanhawla'n ziaka ngenna a thehlut tih sawiin, package pathum zinga sorkar laipuiin a pawm loh package pahnih pawh annual plan 2016-2017 chhunga pawm hman a nih ngei theihna tura chak taka a nawr thu a sawi.  

Hei bakah hian Khuallian chuan high school leh middle school zirtirtu lakna tur dan Recruitment Rules siam that a nih thu te, zirtirtu hmun ruak awm zawng zawng atanga zaa 30.33 chu science leh mathematics-a thiamna neite tan dah hran a nih thu te; elementary school tihhmasawn na'n sorkar enkawl primary school 9 leh middle school 1 chu model school atan thlan a nih thu te a sawi. Sikul la kái lo kum naupang lehzualte tan Early Childhood Care and Education (ECCE) chu primary school 66-a tan a nih tawh thu a sawi bawk. 

Licheng muala Independence Day lawmna hunah hian Cultural Club Tlabung, YCA Nunsury leh SHMS Tlabung-ten hnam làm hmuhnawm tak an entir a, zalenna champha lawmna hunpui hman zawh hnu hian, Sub-Divisional Hospital, Tlabung leh Leprosy Hospital-am damlote tlawhin Parliamentary Secretary hian thilpek a hlan nghal a ni.

Khuallian hi Commerce and Industries department director Pu J. Hmingthanmawia leh SSA Lunglei District Deputy DPC Pu Kawlkunga Kawlni-ten an tawiawm a ni.