Environment, Forests & Climate Change  department hnuaia Tlabung Forest  Range staff-te chuan tunlai hian Khawthlangtuipui dung leh a chhehvel a Teak thing  dan lova kih leh tawlh te vai leh manna hna thawkin beihpui an thlak a.  Teak thing tum(teak log) Bangladesh lama tawlh ruk tur ni ngeia rin thahnem tawk tak an man. Nimin thleng khan Teak thing tum 800 vel zet  man a ni tawh a ni. Heng Teak log  man khawmte hi Khawthlangtuipui dunga tawlh khawmin lui atangin lak chhuah mek zel a ni a. Vawiin thleng hian teak log 600 vel luikamah lakchhuah a ni tawh a ni.

Pu Lalbiakchama Chawngthu, DFO, Tlabung Division chuan Mizoram Forest department in field staff indaihlohna chungchanga harsatna a tawh mek  chu Tlabung Division ah pawh an harsatna a ni tih tarlangin, Khawthlangtuipui dunga teak thing tawlhrukte hneh taka venhim a harsat thin thu a tarlang. Tin, DFO chuan teak thing tawlh ruk hi fur ruahtui tam lai leh tuilen laiin a tam a, thing tumte hi zanah tuilian lentirin, lui mawnglam leh Bangladesh hnaih lamahte an lo chang leh a, man kim vek a harsat thin thu leh an mante pawh neitu hriatloh (unclaimed) a tam ber tih a tarlang bawk. Tlabung Forest Division staff te hi BSF (159 Battalion) tuna Indo-Bangla border-a camp mek te nen pawh forest protection kawngah an thawhho that thu a sawi a. Thing leh mau tawlh ruk chungchang hi Indo-Bangla border issue a nih avangin ram pahnih inkara bilateral talk hmanga chinfel theih a nih a rinthu a tarlang bawk.

Kum thum leh a chanve kalta chhung khan Tlabung Forest Division chuan  Teak log leh mau vawi 82  an man tawh a. Teak log man zawng zawng zat hi 8000 chuang zet a ni. Motor  vawi 21, Lawng(boat) vawi 27 leh smuggler    mi   24 an man tawh bawk. Heng an thil man atanga Revenue hmuh zawng zawng hi Rs nuai 47.00 vel a ni a; Teak log man sa Court Case kalpui mek leh auction tur hi 3000 vel Tlabung Forest Complex ah a awm mek bawk.

Tlabung leh a chhehvel hi sorkar leh mimal teak plantation tamna a nih laiin, a hralhna a that loh avangin dankalhin Bangladesh lamah Mizoram teak tawlhchhuah a ni thin a; Forest Department in Teak Public Auction a neih pawhin hralh that a harsa hle.Tunah erawh chuan NH 302 ,Lunglei- Tlabung kawng a that tak avangin  Lunglei,Aizawl leh Mizoram hmun  dang tangin Teak thing leitute an hmu tan a, hei hian Tlabung leh a chhehvel a tanga Forest produce  Bangladesh lam dankalha lut thin pawh a tih ziaawm phah ngei beisei a ni.