Cheng nuai 484 chuang senga sak Tlabung Tourist Lodge chu nimin khan West Tuipui bialtu MLA Pu Nihar Kanti Chakma-a'n a hawng. Tlabung Tourist Lodge hawnna inkhawm hi a kawt tual zawlah buatsaih niin, Tourism department Joint Secretary Pi Irene Zohlimpuii Chongthu-in kaihruaiin Pu Nihar Kanti Chakma, West Tuipui Assembly Constituency bialtu MLA-in a hawng a ni.
Tourist Pu Nihar Kanti Chakma chuan, Tlabung mipuiten hun rei tak an lo nghah tawh Tourist Lodge sak thar hawn a ni ta chu lawmawm a tih thu leh, Tlabung tan rohlu a tlin thu a sawi a, Tourist Lodge chu Tlabunga building tha ber a nih thu sawiin, a hlawhtlinna tura hma latu department-a thawkte chungah lawm thu a sawi a ni. West Tuipui bialtu MLA chuan, Tlabung chu Mizorama khaw pawimawh leh, mite hriat lâr ni mah se, riahbuk tha a awm loh avangin Tlabung tlawh châk mi tam tak an zin loh phah thin thu leh, Sorkar thil pawimawha zin thin official-te pawhin harsatna thenkhat an tawh phah thin thu a sawi a, ram pahnihte insumdawn tawn hunah Tlabung chu a la pawimawh lehzual dawn tih sawiin, tourist lodge hawn thar tak chu a la hlu zel dawn niin a sawi.
Hawnna inkhawm kaihruaitu Pi Irene Zohlimpuii Chongthu chuan, Tourism Department-in hmachhawp hrang hrang a duan thu leh, chung zinga thil thenkhat chu India ram hmarchhak mai bakah, ram chhung hmun dangah pawh la awm ngai lo a nih thu sawiin, sky walk leh rope way siam tuma chak taka hma lak mek a nih thu a sawi a, hei bakah hian khualzinte tana thlen-in awm lohna hmunah, mimal chenna in te chu man chawia luah theih tura Sorkar tanpuinaa thuam changtlun thin a nih thu a sawi.
Pi Rachel Lalrinhlui, Tourism Officer in Technical report pein Tlabung tourist lodge hi Project Infrastructure Development of Destinations and Circuit scheme hnuaiah, September 30, 2013 khan sak tan niin, kumin August 13 khan sak zawh a ni a, a building pui zauzawng chu 635.98 sq.m niin, floor hnihah hian pindan 13 a awm a, hei bakah hian thawktute chenna tur in pakhat sak a nih thu a tarlang.
Tourist lodge hawnna hunah hian, Aizawl leh Lungleia Tourism department-a thawkte bakah, Tlabunga officer-te, VC leh khawtlang huap pawl hrang hrang hruiatu an kal tha hle a ni.
