Vawiin chawhma khan Lunglei West A/C bialtu MLA Pu Chalrosanga Ralte chuan in neilote  tana insak tanpuina Scheme Pradhan Mantri Awas Yojana (PMAY) - Housing For All (Urban) chu Lunglei Town area huam chhunga hman turin Convention Centre ah a hawng. He hunah hian UD&PA Department hotute leh beneficiary thahnem tak an kalkhawm.

Pu Chalrosanga Ralte chuan insak tanpuina Scheme PMAY- Housing For All (Urban) hnuaiah Lunglei Town Area ah beneficiary chhungkaw 792 zet thlanchhuah an ni chu a lawmpui thu sawiin tanpuina dawngtute chu a nihna tur ang taka hmang turin a chah a. Ram hmasawnna kawngah sawrkar a tang em em a, chuvangin  mipuite pawhin tan an lak ve a tul a ni tiin tanpuina dawnah duh tawk mai lovin tih tur leh mawhphurhna an neih ve te hlen chhuak turin kalkhawmte a chah a ni.  

‘Pradhan Mantri Awas Yojana (PMAY)-Housing for All (HFA) 2022 Mission’ chu  June 2015-a puanchhuah a nih atangin Mizoramah pawh hmalak a ni a. He scheme hi awmze nei leh tha zawka  kal theih beiseiin State sorkar chuan District Screening Commitee chu a din a. PMAY-HFA Beneficiary Led-Construction (BLC) component hnuaia dilna thehlut tute chu chenna in ngeia kal chilh niin endik an ni.

He scheme hnuaiah hian beneficiary chhungkaw tinin insak tanpuina Rs.1,50,000/- theuh an dawng dawn a. He tanpuina hi installment thum (3) in pekchhuah tur niin beneficiaries ten anmahni sum senga foundation khur laih leh insakna tur hmun laihzawl ngaite an laihzawl zawh hnua ha a hnuaia mi ang hian pek chhuah a ni ang:

i. 1st Installment atan hian 40% (i.e Rs 60,000/-) pek ani ang a, Insak na tur ram geo-tagged (Vacant Land Geo-tagged) zawh hnu ah chauh 1st installment hi pek chhuah ani ang a, hemi hmang hian foundation leh structure zawng zawng a bangrel leh bang pin hna sak/thawh zawh tur ani ang.

ii. 2nd Installment hi beneficiary ten in sak tur foundation leh structure leh bang pin hna an sak/thawh zawh hnu ah 40% (i.e Rs. 60,000/- pek ani ang a, Bang pin zawh hnu geo-tagged (Linetel level Geo-tagged) zawh hnu ah chauh 2nd installment hi pek chhuah ani ang a, hemi hmang hian in chhuat te, Toilet leh Bathroom te leh inchung (roof) sak hna te thawh zawh tur a ni ang.

iii. 3rd Installment ah hian 20% (i.eRs. 30,000/-)  pek a ni ang a, in sak zawh vek tawh (completed) hnu ah leh In sak pum vek hnu Geo-tagged (Completed stage geo-tagged) zawh hnu ah Department in a en dik ang a, Completion Certificate a issue hnu ah chauh 3rd installment hi pek chhuah tur a ni ang.

 Pawisa hi Bank Account  kaltlanga pek tura ruahman ani a, Beneficiaries zawng zawng ten  Bank account an nei vek tur a ni a, he bank account hi beneficiary Aadhaar number nen in zawm (Linked) ngei tur a ni. Pawisa realease tawh sa hmandan turah hian Department - in ruahmanna a siampui ang a. A hna viltu Department thawktute hriatpuina tello chuan pawisa hi Bank atangin lakchhuah theih ani lo ang. In sakna hmanrua Thing, Rangva,Tile te hi Department - in Quality inang tlanga hman a nih theih nan leh market price sang thut tur ven nan, lei a dan tur ruahmanpui bawk ang.