Khawthlang Tuipui lian avangin Tlabung khua leh a chhehvel ah chhiatna nasa tak a thleng mek a. Tuilian avang hian Tlabung khua ah chhungkaw 173 te an in thiar chhuak tawh a. Serhuan, Tipperaghat, Bindasora, Diblibagh leh a chhehvel ah te pawh chhungkaw tam tak an in thiar chhuak mek a, hmun him lam pan pui an ni. 

Tlabung SDO (C) Pi V. Lalmuanpuii kaihhruaina hnuaiah Disaster Management Committee ten chhanchhuah leh chhawmdawl hna an thawk mek zel a. Serhuanah silpaulin 20 leh buhfai bag 20 an thawn tawh a, BSF-nen tangkawpin tui thianghlim in tur an sem mek bawk a. Mipuite hmun him zawka hruai nan leh mamawh hrang hrang semchhuah nan Forest Department leh Police lawng (boat) te hman mek a ni. Tipperaghat, Bindasora, Tablabagh, silgur, diblibagh etc ah Silpaulin, tui in tur leh buhfai a tul anga sem turin ruahmanna fel tak siam a ni tawh. Tlabung SDPO Pu K Beihmotaosa chu Incident Commander ah ruat niin a kaihhruaina hnuaiah SDRF ten chhawmdawl hna an thawk mek a. Tun dinhmunah SDRF member 10 te an thawkchhuak mek a ni. SDO, PWD kaihhruaina hnuaia Inspection team ten electric ban tlu mai thei leh in chim hlauhawm te a awm em tih enfiahin inspection an nei bawk a. Medical team ten theihtawp an chhuah mek bawk. Lunglei DC atangin silpaulin, diesel, petrol leh mamawh dang thawn thlak a ni tawh. Chhanchhuah leh chhawmdawl hna hi YMA leh BSF te nen tangkawpin chak taka kalpui mek zel a ni.

Attachment

  • Loading attachment...