1115/2026-2027

Lunglei, 2026 Nikir thla ni 22: Sawrkar laipui ruahman angin Mahatma Gandhi National Rural Employment Guarantee Act (MGNREGA) thlakna atana July ni 1, 2026 aṭanga hman ṭan tur, Viksit Bharat—Guarantee for Rozgar and Ajeevika Mission (Gramin) [VB–G RAM G] chungchang inhrilhfiahna hun chu vawiin khan Tlabung RD Block huam chhunga Village Employment Council te pualin buatsaih a ni.

Tlabung BDO Confenrence Hall-a he hun hmanah hian Tlabung Block Development Officer (BDO) Pu Moses Lalfakawma Tlau chuan MGNREGA chu titawpin, a aia ṭha zawk tura ruahman VB–G RAM G chu kalpui thuai a nih tur thu a sawi a. He scheme tharah hian kum khata inhlawh theih ni zat tihpun a nih thu leh hna thawh theih tur bithliah pawh zau zawka ruahman a nih tawh thu sawiin, khaw tinin ṭangkai lehzuala hmang ṭheuh turin duhsakna a hlan.

He hunah hian Pu East Vanlal Chhanchhuaha, APO-I chuan VB–G RAM G chungchang a sawi fiah a. Pu T. Lallungawipuia, CA chuan MIS (Management Information System) chungchang zirtirin, Pu F. Vanngurliana, TA chuan scheme kalpui dan tur chungchanga hriat tur pawimawh hrang hrang a zirtir a. Zawhna leh chhanna leh sawi hona hun hman a ni bawk.

VB-G RAM G hi July 2026 aṭanga kalpui ṭan tura ruahman a ni a. MGNREGA-ah ni 100 inhlawhna kalpui a nih laiin, VB–G RAM G-ah chuan ni 125 inhlawhna kalpui a ni tawh dawn a. Hna thawh theih (permissible works) zat pawh 266 aṭangin 318-ah tihsan niin, inhlawhna rate pawh tisang tura ruahman a ni.