3585/2024-2025

Aizawl dated 17th December 2024: Vawiin chawhnu khan Megawatt 120 siam chhuah theihna tur, Tlawng Hydel Project khuahna tur a ruahman North Lungleng bul a Tlawng kam ah Pu F.Rodingliana, Power & Electricity Department Minister chuan Press Conference neiin thuthar thehdarhtute a kawm.

Power & Electricity Department Minister chuan Tlawng lui khuah tur chungchang sawifiahin, Ministry of Water Resources, Govt. of India chuan Tlawng HEP Survey & Investigation (S&I) thawh nan leh Detailed Project Report(DPR) siam nan kum 2014 khan Cheng Vbc11.55 a sanctioned a, he hna hi Central Water Commission(CWC) thawh tura tih a ni a. CWC chuan Survey & Investigation hna hi February 2015 khan thawk tan in tun ah hian DPR siam pum turin hma a la mek zel a ni.

Tun a Survey & Investigation neih tawh atanga a lan danin Tlawng Hydro Electric Project (HEP) hi Aizawl bul hnai, North Lungleng bula siam tura ruahman a ni a, he Project hian 120 MW a pe chhuak thei dawn a ni. North Lungleng bul Tlawng luiah tuikhuah siam a ni ang a, a san zawng hi 120 meters tur a ruahman niin Village council ram engemaw zat tuikhua hian a chim dawn a. Amaherawh chu, khua leh in engmah a chim buai lo tur a ruahman a ni. Tuikhuah hian huan, lo, ram atan a la hman loh (uncultivable area) 2888 Ha. a zau leh thlai chin nana hman mek (Cultivable area) 187 Ha. vel a zau a chim pha tur a ngaih a ni. Tuikhuah hi Thenzawl piah Ramlaitui/Kawlhawk khua zawn vel thleng a huam dawn a ni.

CWC lam hian Topographical Survey te, Geotechnical investigation te, Seismic Study te, Construction material Survey te an ti zo tawh a. Tuikhuah/Dam siamna tur hmun a foundation study hi engemaw chen kalpui tawhin  lei chhungril awm dan zirchianna ‘Drifting’ hna an la bak a. He hna thawk tur hian tender koh tawh niin, tender evaluation tih mek a ni a. He hna hi tluang tak a thawh a nih chuan thla 4 vel awh tur a ngaih a ni a. Drifting work hi zawh fel a nih veleh a ruangam awm dan tur leh senso ngai zat tur te chhut nghal a ni ang. Kum 2025 lai hawl velah chuan DPR hi peih fel beisei a ni a. DPR hi peih fel a nih veleh Mizoram sawrkar chuan he project tihlawhtling tur hian kut a thlak nghal dawn a ni.

Minister Pu F. Rodingliana tarlan danin he project hian tui 1009.6 Million Cubic Meter a khawl thei dawn a, he project atanga kawlphetha siam chhuah nan a tui hman te chu Tlawng lui tui kam zel tur venna tha takah a chang dawn a. Tun hnaia Aizawl khawpuiin thal laia harsatna kan tawh thin, Tlawng lui atanga tuithianghlim duhkhawp pump chhoh tur awm loh thin avang a harsatna awm thin pawh a sutkiang theih beisei a nih thu a sawi bawk.

Vawiin Tlawng Hydel Project chungchang a Press Conference hi Pi K.Lalrinzuali, IAS, Secretary, Power & Electricity Department chuan a kaihruai a, Er. Lalnithanga, Chief Engineer, Er. C.Lalropianga, Chief Engineer, Er. JH Malsawma, Chief Engineer, Er. Ngursailova Sailo, Chief Engineer, P&E Department a thawktute dangte leh CWC a thawktute, he hun ah hian an tel a ni.