RMSA sum cheng nuai 30.81 senga Govt. Tlungvel High School Building sak zawh tak chu nimin khan Mizoram KVI Board Chairman Pu K.Lianzuala chuan a hawng.

He school hawnna pual inkhawm buatsaih hi Pu Lalhlimpuia Khiangte, Dy. District Programme Coordinator, RMSA, Aizawl District-in a kaihruai a. Building hawngtu Pu K.Lianzuala chuan ama bial chhunga mi High School building tha taka sak a nih chu chhuanawm a tih thu leh hemi atana hma latu RMSA hotute chungah lawmthu a sawi. Sorkarin zirna hmasawn nan sum tam tak senga building tha tak tak a buatsaih mek lai hian zirlai, zirtirtu leh nu leh pa ten result tha tak neih ve thung tura tan lak a tul a ni, a ti. ‘Nghawngkawl bial’ tia an sawi fiamthu thin Tuikum bial chhunga hmasawnna hrang hrang Mizoram sorkarin a kalpui tarlangin Pu K.Lianzuala chuan khaw tam takah RMSA High School peihfel a nih thu te, khawtin intlawhpawh tura kalkawng sial mek leh tui thianghlim pekna kawnga hmalakna te chu a langsar zual a ni, a ti a. Baktawng-ah khualzin chawlh hahdamna tur hmun buatsaih tur a nih tur thu leh Chhingchhip-a Sainik School hna pawh chak taka tan mek a ni bawk, a ti.

Pu Azaria Laltinkima, Project Engineer (RMSA) chuan he building sak dan chanchin kimchang a sawi a. Pu S. Thanhuta Sailo, OSD, RMSA-in lawmthu sawina hun hmangin hun a khar a ni.

Tlungvel Govt. High School building sak hna hi nikum February thla khan tan a ni a, a sakna senso zawng zawng hi cheng nuai 30.81 a ni. He school building tharah hian Classroom pahnih feet 24 bial a awm a, Computer Room, Artcraft Room, Library, Science Laboratory Room pakhat theuh a awm bawk. Electric zawm fel nghal vek niin thuthleng leh dawhkan mamawh hrang hranga thuam nghal a ni.