No.2676/2021-2022

Aizawl, 21st. October, 2021 : Vawiin chawhnu dar 1:00 khan Khawzawl District huamchhunga awm Tualte khuaah Tomato lawh runpui leh Tomato vailiamna hun hman a ni. He hunah hian Pu C.C. Lalchhuangkima, Deputy Commissioner, Khawzawl District chu khuallian niin, khualzahawm Dr. Elizabeth Saipari, Director, Horticulture Department nen District hrang hranga hralhchhuah tur tomato quintal 200.68 phurtu motor engemawzat an vailiam a ni.

Hemi puala Vanhnuailiana Hall, Tualte-a hun hmanah Khuallian Pu C.C. Lalchhuangkima, District Bawrhsap chuan Tualte khawtlangin Mizorama langsar thama tomato an tharchhuak chu thil lawmawm tak a ni, a ti a. Tomato chin uar chuan thalai awm mai mai, ruihhlo lama tlan turte a veng tel tih sawiin, a tulna apianga pui turin District administration chu a inpeih reng tih a sawi a. Mizorama cheng zawng zawngte chu Tualte tomato eitu an lo nih theuh theih nan, a aia tam zawk tharchhuak thei tura tan la sauh sauh turin a sawm nghal bawk a ni.

DC chuan sawi chhunzawmin, bialtu MLA, Deputy Chief Minister ni bawk Pu Tawnluia pawhin Tualte tomato chingtute leh Tualte khawtlang a ngaihsak hle a ni, a ti a. Tomato thar chhuah tawh sawngbawlna (processing plant) cheng nuai 7 man ngaihtuahsak tawhin, a in sakbelhna turin cheng nuai 6  ruahman a ni bawk a. Nakuma tomato chinna tur ram panna tur kawng laihna atan Rural Development Department hnuai atangin cheng nuai 20 ruahman fel tawh a nih thu Deputy CM hnen atanga dawn a nih thu a tarlang bawk.

Rokhawlhna avangin Dy. CM in Tomato lawh runpui leh vailiamna hun hmanpui thei lo mahse Tomato sawngbawlna khawl hawnnaah telpui ngei a tum tih Bawrhsap chuan a sawi a. Tomato chingtu pawh pung zela thar tam zel tur leh, sawrkar buaipui tham thar chhuak tura a chah thu sawiin, a hralhna turah pawh sawrkar chuan hma a lakpui zel dawn thu a sawi tih a tarlang bawk.

Khualzahawm Dr. Elizabeth Saipari pawhin thu sawiin bialtu MLA, Dy. CM in Tualte khuaa Tomato chingtute mamawhna hriaa khawl a ngaihtuahsak chu lawmawm a tih thu leh hei hi Mizoramah a hmasa ber a ni tih sawiin, tunah hian khawl dahna tur In pawh RD Department hnuaiah sak tuma hmalak mek a nih thu te, an hnathawh chhoh zelnaah Sawrkar Department hrang hrangte pawhin a tul anga hma an lak theih dan tur Dy. CM in a ruahman tih a sawi bawk.

Horticulture Director chuan Tualte khuain Tomato hralhna atangin kuminah nuai 100 chuang an lei theih a ring tih sawiin, Tualte khuain Tomato an thar chhuah hi District hrang hrangin an hre tawh a ni, a ti a. Mizorama Horticulture Tourism tihhmasawn leh chawilar kawngah dinhmun pawimawh tak an luah chho thei tih sawiin, damdawi hman chungchangah Department lamin a him tawk an tih bak hmang lo turin a chah bawk a ni.

Tualte khua hian kum 2019 atang khan khawtlang huapin Tomato ching tanin 2019 khan chhungkaw 24 in Grade A Qtl.  250 leh Grade B Qtl. 15 an thar a. 2020 khan chhungkaw 60 in Grade A Qtl. 850 leh Grade B Qtl. 25 an thar a. Kuminah chhungkaw 130 in vawiin thleng khan Grade A Qtl. 2118.57 leh Grade B Qtl. 50 an thar chhuak tawh a ni. Kumin bika tomato hralhchhuahna atanga an sum lakluh tawh zat hi cheng nuai sawmsarih pasarih leh singli sangnga chuang a ni tawh a. Tomato hi Arka Samrat leh Arka Abhed Variety te chin niin, chhungkaw pakhatin chawhrualin tomato kung 2000-3000 an ching a, kung khatah kg 3-5 vel zel an tharchhuak a ni.

Vawiina hun hman hi Pu R. Lalchhanchhuaha, President, Tualte Tomato Growers Association chuan a kaihruai a. Pu Peter Lalramhluna, ADHO chuan Technical Report leh Department hmalaknate a tarlang a. Pu Lalzemawia, Tualte VCP leh Pu Vanlalsanga, Chairman, Tualte Welfare ten thu an sawi bawk a. Pu Lalengzuala, District Horticulture Officer, Khawzawl District-in lawmthu sawiin hun a khar a ni.

Vanhnuailiana Hall-a hun hman zawhah hian Tomato chinna hmun leh Tomato tharchhuah tawh sawngbawlna hmun (Processing plant) te an tlawh a, tihzauh dan tur leh bungraw mamawh belh turte an enho nghal a ni.

He hunah hian Horticulture Department hotute bakah Khawzawl atangin sawrkar Department hrang hrang hotute, MJA member-te leh sawm bikte an tel a ni.