No.2675/2021-2022
Aizawl 20th Oct. 2021 : Vawiin chawhnu khan Integrated Training Centre (ITC), tuna School of Agriculture Science (SAS) tia hming thlak tak atanga Basic Agriculture Training (BAT) zir chhuakte thlahna hun Passing Out Ceremony hun hman a ni a. He hun hi Agriculture Minister Pu C. Lalrinsanga'n khuallian niin a hmanpui a ni.
Inkhawm hi Pu Rohmingthanga Colney Director of Agriculture chuan a kaihruai a. Khuallian chuan thu sawiin "He hmun atanga zir chhuak zirlai 28-te hi ka lawmpui takzet che u a, in thiamna leh theihna te hna hmuh nan ringawt a hmang mai lovin rinawmna leh taimakna nen loneitute tana țangkai taka hmang turin duhsakna ka hlan che u a. He zirna sikul hi ka ngai pawimawh hle a, Agriculture Department changtu Minister ka nih tirh atangin Basic Agriculture Science zirna kalpui mek hi a țhat viau rualin Diploma course tal zir thei tura upgrade turin theih tawp kan chhuah a, vawiin niah zirna sikul sang zawk School of Agriculture Science(SAS) kan nei ta hi a lawmawm hle a,Mizoramin bung thar kan kai theihna tura hma latu zinga ka lo tel ve thei hi thinlung takin ka lawm a ni."a ti.
Khawvel ram tam zawk hian an ram economy siam that nan Agriculture an hmang a, keini pawhin chu chu kan tih ve a ngai ni tiin theih tawp kan chuah a, sawrkar hnathawh chu a tha reng, project te siamin thiamna nen Agriculture lamah hian hma la ila, kan Aizawl khawpui ringawtah pawh demand a san dan ngaihtuah hian tih tak taka kan tih chuan a eizawnna tling a awm a ni a ti.
Pathianin ram leilung tha tak min pe a, a enkawl turin mawhphurhna min pe a, kan enkawl dan chu a hre tute kan ni, kan enkawl that a tul em em a, intodelh theihna tham a awm a ni tiin zirlaite chu an zir thiam tawhte intuaihriam reng tur leh, midangte tanpui nana hmang tangkai turin a chah a. Sawrkar hna thawh hi a that em em rual in sawrkar hna thawk lo pawhin tunah chuan eizawnna bul an tan thei tawh ani tiim, theih tawp chhuaha hlawhtlinna chang chhunzawm zel turin duhsakna a hlan bawk.
Tun tuma Trainees thlah tak te hi BAT-ah chuan Batch hnuhnung ber tur an ni a. Batch 32-na niin zirlai 28 an ni a, Distinction-ah mi pakhat passed-in 1st Division-ah mi 14, 2nd Division-ah mi 12 pass-in simple pass mi 2 an awm bawk a ni. 1-na Caron K. Vanlalruati, Zonuam Aizawl, 2-na Malsawmdawngkimi, Saikhamakawn leh 3rd-na Lalramnunsangi, Seling te an ni. Passing Out Ceremony hman hma hian Minister hian School of Agriculture Science (SAS) Administrative Building leh Hostel building sak tur lungphum a phum bawk a ni.
Attachment
- Loading attachment...
