No.1843/2020-2021

Dated Serchhip, the 9th June, 2020: Vawiin chawhnu hian Serchhip District Level Task Force on Covid19 te chu an Chairman Dr. Lalzirmawia Chhangte, IAS hovin DC Conference Hall ah an thukhawm a, total lockdown kalpui dan tur inkaihhruaina zirhona te, district dinhmun te leh total lockdown laia village level hote hmalak dan turte an sawi ho.

Dr. Lalzirmawia Chhangte chuan, kan dinhmun zirchiangin mithiamte rawn chungin sawrkar chuan hapta hnih chhung awh tur total lockdown a puang leh ta a. Hei hi kan zavaia himna tur thil a nih hriain mitinin tha taka kan zawm theuh a tul a ni, a ti a. Police leh VLTF te an pawimawh hle dawn tih sawiin thahnem ngai taka thawk chhuak zui zel turin a sawm bawk. Mipui tichiai thei zeldin thubawl mai mai thehdarh kawnga fimkhur turin mitin a ngen a, sawrkar hnathawkte phei chuan chutiang thil engmah an ti thianglo tih inhre thar tura ngenin, mipui thlabar thlamuana hnemtu tur zawk kan ni tih inhre turin a chah a ni. Khaw hrang hrang ten khunghran mekte tan thilpek an pek nasat avangin lawmthu a sawi nawn leh bawk.

Meetingah hian Pu Denny Lalchhuanawma, SDC chuan quarantine mek dinhmun report a pe a, State danga tangkhang lo haw tawh hi 440 an awm mek a, thenkhat ten an inkhung hun chhung hmang zo tawhin tuna la khunghran mek hi sawrkar Facility ah 173, Community Centre ah 108, Home Quarantine 15 leh Isolation ah 21 an ni. Dr. Lalhlunpuii, District Surveillance Officer pawhin Medical reports a pe bawk a. Rt PCR result hriattawh 62, nghah mek 65 leh vawiina thawn thlak 52 an awm a, he thu buatsaih lai hian vawiin Rt PCR Result update kan la hre hman lo a ni. Tin, Chennai atanga rawn haw khunghran hun hmang zova mahni inlama awm tawhte zawng zawng tlawh chhuah leh mek an ni a, an vaiia RAT test leh vek tur niin mi 36 zinga 17 RAT result hriat tawh niin an non-reactive vek a, a bak la awm te pawh vawiin leh naktukah tlawh chhunzawm zel an ni ang. Chennai atanga rawn haw, khunghran hun hmangzo tawh mahni inlama awm mek te zingah insawiselna nei hriat an la ni lo. Police Department aiawhin Pu PC. Laltanpuia, Addl. SP chuan report a pe bawk a. Ramri hmun hnih Sailulak leh Lungkawlh ah Police panga ve ve March ni 12 atang khan vawiin thlengin an la duty a. An hnen atangin reports duhawm lo engmah la dawn a la ni lo. Covid19 laka kan himna tur dan awm te theihtawp chhuaha kenkawh zel a nih thu sawiin, Quarantine Centres zawng zawng uluk takin chhun zan zawma ven a ni a, state pawn atanga lo haw district paltlang tur te reng reng district chhung chinah Escort vek thin an ni.

Vawiinah meetingah hian Village Level Task Force te hmalak dan tur tlangpui duan a ni bawk a. Serchhip khaw chhunga Village Level Task Force te chu an duty na hmunah theuh hrui pawta duty leh tura beisei an ni a. Feh tur ten Task Force ah phalna lehkha lak leh tur niin, feh hunbi erawh siam kher tawh loh tha tih a ni. Zingkara feh chhuak duhte chuan a hmain an Local task Force ah phalna laklawk a ngai bawk ang. Vawiina VLTF te hmalak dan tur ruahmanna sawite hi chipchiar zawkin zanin vek hian tihchhuah hman tum a ni e.

Meeting ah hian DLTF members te leh Serchhip chhunga VLTF aiawh te an tel hlawm a ni.