2942/2025-2026

Aizawl, the 16th of January, 2026: Tourism Minister Pu Lalnghinglova Hmar chuan kumin chhungin tourism chungchanga mipui inzirtirna, inzirna leh inrawn khawmna uar zawka kalpui a nih tur thu vawiin chawhmaa Mizoram Tourism Service Association (MTSA) infuihtharnaah a sawi.

MTSA hian Tourist Lodge, Chaltlang-ah infuihtharna hun hmangin General Conference an nei nghal a, he huna khuallian Tourism Minister chuan Tourism Department kalpui an tum dan sawiin thawktute pawh inbuatsaih lawk turin a chah.

Pu Lalnghinglova Hmar chuan, "Mizoramah khualzin an pung hi a lawmawm takzet a, mipui nawlpui pawh an lawm a, hei hian kan economy pawh a ṭha zawngin a nghawng ngei ang. Hetihlai hian tourist-te hian thil ṭha chauh ni lo, thil ṭha lo pawh an luhpui châng a awm a, heng thilte lo dawngsawng thiam tur leh, tourist nena chenho kan thiam hi a pawimawh a, inzirna uar zawka kalpui a ngai a ni," a ti.

Tourism Minister chuan kohhran, tlawmngai pawl hrang hrang, zirna in leh pawl hrang hrang nen a tam thei anga inhmuh khawma inkawm a ṭul thu a sawi chhunzawm a, "Tourism hi mitin khawih a nih avangin Department-in mal beih chi a ni lo a, ṭan rualna tur a ni," a ti.

Kum khat chhunga khualzin hip thei tur calendar an siam chu a ṭangkai tur thu leh khualzinin zin chhan an neih zel theihna turin 'event' tam zawk buatsaih an tum tih a sawi a, "Mizoram mawina hi tun hma aṭangin a la pangngai reng. Miin an tlawh a, an lo zin duhna turin tourist hip tur event buatsaih a ṭul" tiin, "He mi kawngah hian ṭhenawm state-te hnungah kan tlan mek a, zawi zawiin hma kan sawn chho zel ang," a ti.

Pu Lalnghinglova Hmar chuan tunhnaia khawtlang nen ṭang ruala tourism (community based tourism) kalpuiah hlawhtlinna an hmu chu lawmawm a tih thu sawiin, a hlawkna chu a khaw neituten tel zel turin ruahmanna an siam zel dawn tih a sawi a. Winter Festival lian zawk leh huam zau zawk buatsaih an tum tur thu a sawi lang bawk.

Tun hnaiah tourism hmasawnna tur infrastructure project atan sum beisei an neih thu a sawi rualin, "A pawimawh ber chu infrastructure lam ni loin kan ram mawina pho lan thiam leh khualzin dâwn sawn thiam a ni," a ti a, khualzin dawnsawn kawngah Tourism Department hnathawktute ṭan la zel turin Minister chuan a fuih a ni.

MTSA Infuihtharna hun hi Tourism Director Pi R Lalrodingi'n a kaihruai a ni.