2943/2025-2026

Dated Aizawl, the 16th January, 2026: Nimin, January ni 15, 2026 khan Organic Mizoram (MOM) enkawl Farmers Producer Company zinga Organic Ginger (Sawhthing), Organic Mizo Chilli (Mizo Hmarcha) leh Organic Turmeric (Aieng) chingtu FPC-te koh khawm an ni a. An thlai thar chhuah hralhna kawnga hma lak zui dan tur hrang hrang relin, Irrigation and Water Resources Auditorium-ah, MINECO-ah meeting pawimawh tak neih a ni. He hunah hian Dr. KC Lalmalsawmzauva, Adviser to Chief Minister chu Khuallian niiin, Pi Ramdinliani, Special Secretary, Agriculture & Farmers Welfare Department chuan Meeting a kaihruai a ni. He hunah hian MOVCD-NER Scheme kaltlanga din, Organic FPC zinga Sawhthing, Mizo Hmarcha leh Aieng chingtu Mizoram District hrang hrang ațangin koh khawm an ni.

He hunah hian khuallian Dr. KC Lalmalsawmzauva, Adviser to Chief Minister chuan thu sawiin, loineitute zingah sawrkar puihna dawn chhunga nung, sawrkar aṭanga puihna a tawp ruala tawp ve mai an awm thin chu a that loh thu a tarlang a. Party hrang hrangin kan ramah sawrkarna an siam tawh angin, tuna sawrkar pawh hi hlun tur a ni lo angin a la tla ve leh ngei ang a, chutih hunah chuan an tlak ruala loneitute kalphung dik nei tura sawrkarin a ṭanpui mekte chu tawp ve mai lovin, kawng dik zawka an kal zel chu an duh dan leh an hmathlir lian tak a ni, a ti.

Pi Ramdinliani, Special Secretary, Agriculture & Farmers Welfare Department pawhin thu sawiin, Organic products chu thlai dang aia hlu bik a nih angin a man pawh a to bik tur a ni tih leh a hralh chhuah kawngah pawh FPC-te inlungrual a ṭul thu sawiin, kum kal taa kalphung fuh tawk lote aṭanga inzirfingin, hmasawn a ṭul thu a sawi a. MOVCD-NER scheme a tawp ruala FPC-te an ṭilṭiak mai a, scheme danga an lut leh a nih chuan eng scheme-ah mah hlawhtlinna tak tak an nei chuang lovang, a ti bawk.

FPC Meeting ah hian -

1) FPC hrang hrangten an thlai chin, tharchhuah theih zat turte report pein, sawiho a ni a.
2) Man man zawka Organic tharchhuahte hralh dan tur te,
3) Organic tharchhuahte Minimum Support Price (MSP) huang chhunga awm ve rawt te,
4) Non-Organic/pesticide residue free (invalid certificates) produce rate chungchang te,
5) Buyers nen negotiation kal mek sawi zauna te,
6) Scheme dang MIDH/INM te nen Convergence chungchang te,
7) Transit Certificate chungchang te leh
8) Adoption of FPC chungchang te sawi ho a ni.

Kum 2016 khan Mission Organic Value Chain Development for North Eastern Region (MOVCD-NER) scheme kaltlangin Mizoramah Mission Organic Mizoram (MOM) hi Agriculture & Farmers Welfare Department hnuaiah din țan a ni a. Tunah hian District hrang hrangah Mission Organic Mizoram (MOM) hnuaia loneitute tan hmalakna kalpui mek zel niin, tehfung khauh tak nen Organic Certificate pekchhuah ṭhin a ni a. Organic thlai chingtute tan kawng hrang hranga hmalak mek zel a ni.

MOM hnuaiah hian Phase 4-na kalpui mek niin, FPC (Farmers Producer Company) 41 neih mek a ni a. Organic Farmer 27,604 ten ram hectare 26,500 a zau an nei a ni. Mizorama District hrang hrangah District Level Monitoring Committee (DLMC) te din niin, Deputy Commissioner (DC) te chu Chairman an ni a, anni kaihhruaina hnuaiah hian Organic thlai chingtute hmalakna leh hmasawn zel dan tur te enho a, ngaihtuah zui a ni țhin a ni. Thlai thar chhuahte seng leh sawngbawlna kawnga pui tura hmalakna atan Post Harvest Infarstructure FPC te ngaihtuahpui an ni a. Chung atan chuan, Collection Centre (sawmhnih leh paruk) 26 din ni tawhin, Integrated Pack House (sawm leh panga) 15, Small Processing Unit pakhat (1) leh Transport Vehicle sawm leh pakhat (11) pek chhuah a lo ni tawh bawk a ni.