2944/2025-2026
Dated Aizawl, the 16th January, 2026 : Vawiin khan Pu Lalnghinglova Hmar, Minister, Tourism Department chuan Tourist Lodge, Chaltlang Conference Hall-ah Mizoram Tourism Service Association (MTSA) infuihtharna hun a hmanpui a. He hun hi Pi R.Lalrodingi, Director, Tourism Department chuan a kaihruai.
He infuihtharna hunah hian Tourism Minister chuan Mizoram hmun hrang hranga Tourist Lodge enkawltute hnenah fuihna thu ṭha tak tak sawiin, kumin 2026 atana Department hmalakna tur hrang hrangte a tarlang a. Tourism Department-in khualzin hip theihna tur project hmachhawp lian tak tak a ruahman te, khualzinten kan ram lo tlawh chhan mumal tak an neih theihna tura Tourism event calendar tihchhuah a nih tawh thu te, tun hnaiah khualzin lo pung chho zelin, khawtlang leh kohhrante nena thawhhona tha zawk a awm zel theih nan hmalak a nih tur thu leh mitin thleng phak tourism - Community based tourism hi nasa zawka kalpui chhoh zel Department in a tum thu a sawi bawk.
He hunah hian Mizoram sawrkar hnuaia Tourism Department staff an kal tha hle a, Tourism Industry-in hma a sawn zel theihna tura nasa lehzuala tha leh zung thawh turin kalkhawmte fuih an ni.
