2352/2026-2027

Aizawl, the 24th of September, 2026: Vawiin chawhnu dar 3:00 khan Tourism Department officer te leh Aizawl Municipal Corporation (AMC) aiawhte chuan Tourism Minister Pu Lalnghinglova Hmar hovin homestay enzui leh Aizawl khawpui chei chungchanga thawhho dan tur an sawiho. Tourism Minister office-a meeting-ah hian Pu H. Lalremtluanga, AMC Mayor leh Dr. Lalrozama Ralte, Commissioner & Secretary, Tourism te pawh an tel a ni.

Minister Pu Lalnghinglova Hmar chuan tourism hmasawnna tura Mizoram Sawrkar hmalakna in rah a chhuah mek zel a, a kum telin khualzin an pung tih a sawi a. “Khualzin rawn lut zel se kan duh rualin a ken tel thil tha lo laka inveng turin hma kan lak tel a reng ṭul. Hunpui lo thleng turah kum hmasa aia tam khualzin kan beisei a, an zinga tam ber chuan Aizawl an tlawh dawn avangin AMC nen thawhhona tha tak kan neih a ngai.” a ti a. Khualzinte thlenna, a bikin homestay thenkhat chu ruihhlo leh mipat hmeichhiat kawngah dik lo taka hman a nih thu leh, chumi behchhana Mizoram rawn zin an awm thin ni a an hriat thu a sawi. 

Minister chuan sawi chhunzawmin, “Homestay hi chhungkaw tamtak tan eizawnna a nih avangin a ṭawp ang tih kan hlau a, tourism leh ṭawp hi a inkawp kan duh lo. Chuvangin a ven kawngah AMC area-a Local Council te thawhpui kan duh a ni” a ti a. Aizawl khawpui cheimawi chu khualzin hiptu pakhat a nih avangin, hunpui vuakvetah a hmalama mawi taka chei nise Tourism Department chuan a duh thu a sawi bawk. 

Vawiina meeting-ah hian AMC area-a khualzin thlenna (accommodation unit) ah Tourism Department leh AMC a in register lo an tam thu leh, registration nei lova hetiang kalpuite chu the Mizoram (Registration of Tourist Trade) Act, 2020 hnuaiah Rs. 50,000/- thleng chawitir theih an nih thu ngaihthlak a ni a. AMC area-a Local Council te nen thawkho in, an veng chhung theuhah registration nei lova hotel, homestay etc. kalpuite zawnchhuah runpui neih nise, chumi tur chuan AMC in hma lo la se tih a ni.  Tin, accommodation unit ten an mikhual thlente register-ah an chhinchhiah tha em tih enfiah nghal nise ti a rel a ni bawk.

Meeting chuan hemi chungchang hi October thlatirah Local Council te nen sawiho a, hma la tura hriat ngai pawimawhte inhrilhhriatna hun buatsaih a rel a. Sawrkar kum kal mek chhungin accommodation unit neitute tan Tourism Department leh AMC tangkawpin awareness programme buatsaih nise tih a ni bawk.

Krismas leh kumthar vuakveta Aizawl khawpui chei chungchangah thawhho nise tiin meeting chuan a rel a. Kumdang aia hma zawk, a theih chuan December thla tir atanga êng thei tawh tura hmalak tha tih niin, hmalak zel dan tur chu chipchiar zawka sawiho leh nise tih a ni.