2351/2026-2027

Dated Aizawl, 24th  September 2026: Vawiin khan Directorate of Land Resources, Soil & Water Conservation Department Meeting Hall-ah Finance Department bultumin Land Resources, Soil & Water Conservation Department hnuaia Officer leh Staff hrang hrangte tan Mizoram Integrated Works and Accounts Management System (MIWAS) hnathawh dan enchhinna 'User Acceptance Testing' neih niin application hi hman chhin a ni.

Vawiin hun hmannaah hian Additional Secretary cum Programme Director Pu Lalhmingmawia Sailo chuan kalkhawmte lawmna thu a sawi a; Deputy Secretary cum Deputy Programme Director Pu Laldinpuia'n, he application hman thar turin department tam takte tana hna a tih samkhai dan tur leh, awlsam zawk leh chak zawka hnate thawh a nih theih dan turte a sawi bawk.

Finance Department (FMW) Finance & Accounts Officer Pi Esther Lalremruati, C-DAC Scientist Pu Ranjan Yengkhom leh C-DAC Project Manager Pu Saurabh Tripathi ten kalkhawmte hnenah MIWAS application an siam dante sawiin, a hman dan turte an zirtir a; parameter thlak ngai leh dah belh ngai turte sawi ho nghal a ni bawk.

MIWAS hmang hian awlsam takin department hrang hrangte a enkawl theih dawn a; an sum mamawh zat te, approval leh thil pawimawh dangte pawh online-in a tih vek theih tawh dawn a ni. Detailed Project Report (DPR) siam atanga hamthatna dawngtute hnena sum pek thlengin, mahni-a hnathawk (automate) thei tura duan a ni a, Integrated Financial Management Information System (IFMIS) nen thlunzawm a ni dawn a ni.

He system thar hi Works Department paruk - Public Works Department (PWD), Public Health Engineering Department (PHE), Power & Electricity (P&E), Land Resources, Soil & Water Conservation (LR,S&WC), Irrigation & Water Resources (I&WRD) leh Environment, Forest & Climate Change (EF&CC) ten bill siam nan an hmang ang a, enchhinna (testing) zawh fel a nih veleh a taka hman tan thuai tum a ni.