Vawiin khan Tourism Minister Pu Robert Romawia Royte chuan a pisa-ah China thlenga ke a kal, Mizo Hnam Pasaltha puala Inhmuhkhawmna ‘Meet the Heroes: Peace Pays Organizing Committee’ chu buatsaihin, kaihruaina hun a hmang a. Committee Member 15 an tel a ni.

Tourism Department hmalaknain ‘Meet the Heroes: Peace Pays’ programme  chu August Ni 8, 2019 hian Aizawl-ah hman tura rel a ni a. He hunah hian Mizo tlangval huaisen, ram leh hnam tana nunna thap leh hlante chawimawina leh lawmna hun hman tura ruahman a ni a, he programme hmanna turah hian mawhphurtu hrang hrang insiamin chak taka hma lak zui a ni ang a, hmalaknate leh thil tul dangte sawiho leh turin July Ni 26 a inhmukhawm leh tura rel a ni.

Minister Pu Robert Romawia Royte chuan Vietnam sorkarin Vietnam War hmanga zin mite tam tak an hip dante a sawi a, MNF Independent Movement leh a kaihhnawih chu zin mite hip nana hman a tul thu a sawi bawk a.  Ram leh hnam tana nunna hlu tak hlantute leh theihtawp lo chhuahtute chawimawi leh ngaihhlut inzirtir a pawimawh a, zin mite hip zawnga thil kalpui thiam a tul a tih thu a sawi a. Central sorkara he Program - Meet the Heroes : Peace Pays puala Project thehluh pawh sanction a nih tur thu a sawi lang bawk a ni. 

Vawiin vek hian Minister Pu Robert Romawia Royte chuan Lengpui Sports Complex siamna hmun tur a tlawh nghal a, tihchangtlun dan turte Department hotute leh Lengpui Khawtlang hruaitute nen a hmunah kalin en ho a ni bawk a ni.