Government Lawngtlai College (GLTC) chuan vawiin khan Lawngtlai-III-a Central YLA Hall-ah zirlai tharte lawmna leh pass chhuakte lawmpuina hun "Freshers' Social cum Felicitation" an hmang a, Lawngtlai East bialtu MLA Pu H. Biakzaua chuan khuallian niin a hmanpui.
Khuallian Pu H. Biakzaua hi LADC hnuaia Lawngtlai-III bialtu MDC Pu T. Lalengmuana leh Bualpui W bialtu MDC Pu V. Zathanga te'n an tawiawm a. Mihring hma sawnna atana hmanraw pawimawh ber pakhat chu zirna a nih thu sawiin, Pu H. Biakzaua chuan kan India ram Danpuiah pawh zirna chu a lailum luahtu a ni, a ti a. Lawngtlaiah College pakhat kan nei a, zirtirtu awm chhunte an that viau rualin, zirtirtu leh zirna hmanraw mamawh indaih lohna avangin kan college hian duh khawp a la tling lo hle tiin, science leh commerce zirna te pawh awm ve tawh se tih chu a mimal duhthusam a nih thu a sawi a. Chumi tur erawh chuan zirlaia college chawm zo turin pawl hniam lamah tan lak hmasak tula a hriat thu sawiin, Lawngtlai College-a thawk tur tualchhung mi, duh khawp an awm theih nan zirlaite chu tan la turin a fuih.
Pu H. Biakzaua chuan social media chuan tangkaina tam tak nei mah se, zirlaite tana sut tlang tur harsatna lianpui a nih thu a sawi a. College zirlaite chu mipuiin vantlang chung lama an en, rawn leh rin kai an nih avangin social media chu hmang thiam a, hun khawhral nan leh anmahni thununtu atana hmang lo va, mi thiamte'n vantlang rilru her vela thil thar ching chhuaktu leh mi dang kaihruaitu 14% an tih zinga tel a, a tha lam hawi zawnga vantlang sukthlek kai hertu nih tum turin a chah a. Ram leh hnam hma hun innghahna tak tak an nih avangin, mahni inhre chiang a, innghahna tlaka an nun hmang turin a chah bawk.
GLTC Freshers' Social 2019-ah hian Political Science Head of Department, Pu LH Mawia'n hunserh hmangin, Principal, Pu T. Thangthuama chuan zirlai naupangte fuihna thu tha tak tak a sawi a. College Annual Magazine 2018-19 chu Mizo zirtirtu Pu K. Lailianthanga'n thlir lawkin, Khuallianin a tlangzarh a. Zirtirtute leh zirlai hruaitute hnen a?angin thu sawi hrang hrang ngaihthlak niin, zirlaite atangin malzai, thiangzai leh rualzai te ngaihthlak a nih bakah, lam hmuhnawm tak tak thlir ho a ni a. Zirlai tharte thu tiam rualtira lawm luh an nih bakah, hlawhtlinga zir chhuakte lawmpuina hlan an ni bawk.
Govt Lawngtlai College hi kum 1980-a din niin, tunah hian Arts stream-ah department 9 a awm mek a. Kumin 2019-20 session-ah hian zirlai naupang 300 vel an awm a. Tun result chhuak hnuhnung berah khan 6th Semester zirlai hlawhtlinna chang 27 an nei a ni.
