2088/2022-2023
Aizawl the 27th September 2022 : Vawiin khan Mizoram Tourism Department buatsaihin World Tourism Day 2022 chu Vanapa Hall, Aizawl-ah hman a ni a. He hunah hian Tourism Minister Pu Robert Romawia Royte chu Khuallian leh Pu T.C. Pachhunga, Vice- Chairman, Tourism Development Board chu Khualzahawm niin he hun hi an hmanpui a ni.

World Tourism Day hi khawvel pumah UNWTO ruahmannain thupui thlan bik neiin kum 1980 atang khan hman tan a ni a. Kumin hi a tum 42-na niin, kumin atana thupui chu ‘Re-thinking Tourism’ tih a ni. Vawiin a lawmna inkhawm bultan nan Pi Manisha Saxena, Principal Secretary, Tourism Department chuan kalkhawmte lawmna thu sawiin, Pi Rachel Ralte, Dy. Director, Tourism kaihhruainain kalkhawmte chuan ‘Responsible Tourism Pledge’ sawirualna an nei a. Kumin thupui hmangin presentation ngaihnawm tak Pu V. Lalengmawia, Jt. Secretary, Tourism Department buatsaih chu thlirho a ni bawk.

Khuallian Tourism Minister Pu Robert Romawia Royte chuan November ni 16-18, 2022 chhunga Mizoram-in International Tourism Mart a thlen tur khuh hawnna neiin, khawvel pumah Covid hripui len vangin kum hnih chhung hman theih tak loh ‘World Tourism Day’ chu kuminah hman leh theih a ni thei ta chu lawmawm a tih thu a sawi a. Ramchhung state dangten an la nei miah loh ‘ Responsible Tourism Policy’ chu Mizoram-in a hmang tan tawh a, khawvel hriat tur khawpa nasain tunah hian Mizoram Tourism hmasawn zelna turin chak taka hmalak zel a nih thu a sawi bawk. Mipuite thlawpna leh tanrualna tel lovin Tourism hi kal thei a nih loh avangin Pu Robert Romawia Royte chuan tourism tihhmasawn turin sorkar department-te, mipuite leh chanvo pawimawh nei zawng zawngte chu theihtawpa inbuatsaihin, phurna thar nen, tangrual zelin Mizoram Tourism vawrh chho zel turin a sawm a ni. College hrang hrangah ‘Yuva Tourism Club’ din a ni a, zirlai thalai engemawzatten tourism lamah tuina nei tharin khualzinte lo dawnsawn dan thlengin an inzirtir zel a, heng Yuva Club hmangin Mizoram Tourism hmel tihdanglam a la ni dawn a ni a ti. Tourism hmang hian ram leh state tam takten an sum leh pai (economy) dihmun an siamtha thei a, Mizoram pawh hian rampawn khualzinte chauh ni lovin heng ‘tualchhung tourism’, heritage tourism leh kan ram chhunga nungcha, thing leh mau hmang hian eco tourism te vawrh lar chho zelin ramchhung sum leh pai dinhmun te leh mi tam tak tan eizawnna ngelnghet a siam thieh dawn a ni a ti bawk. Tourism Minister Pu Robert Romawia Royte chuan International Tourism Mart neih chhungin November ni 18-ah khawvelah a ruala guitar perh tam ber kalkhawmna hun hman tum niin, hemi hmang hianMizorma chu Guiness Book of World Records-ah pawh ziah luh beisei a ni a ti a. November ni 14 & 15-a Reiek-a neih tur ‘Anthrium Festival 2022’ chhim turin Pu Robert Romawia Royte chuan mi zawng zawng a sawm nghal bawk a ni.

Khualzahawm Pu T.C. Pachhunga, Vice- Chairman, Tourism Development Board pawhin thusawiin United Nations World Tourism Organisation (UNWTO) chuan vawiin World Tourism Day vawi 42-na pualin Bali, Indonesia-ah a lawmna an hmang mek a, Covid hripuiin na takin khawvel tourism a sut hnuah a lo nungchhuak (re-start) leh mek a ni a ti. World Tourism Day hi a pawimawh em emna chhan chu hmasawnna bulpui pakhat a nih vang a ni a, Tourism chuan khawvel ram hrang hranga hnam ziarang chi hrang hrang humhalhna te, remna leh muanna, inunauna tha leh inhriatthiam tawnna te a tipiang thin a ni a ti bawk. Tourism chu ram hmasawnna atan a tha a, mi te ber pawhin eizawnna a hmuh theihna a ni a, mithiamte chhutdan phei chuan khawvel mihring 10 zelah 1 hi tourism industry-ah inhmang ni zela chhut a ni tih sawiin Pu T.C. Pachhunga chuan tourism hian economy dinhmun a siamthat piah lamah hlim taka khawvel min phuarkhawmtu a ni a ti.

Vawiin World Tourism Day 2022 lawmna hunah hian Tourism Awards hrang hrag sem nghal a ni a. Tourism Departmnet buatsaih ‘Start-up Compettion & Fest’ lawmman semna neih nghal a ni a, lawmman dawngtute chu :
Pakhatna - Lalramnghaka, Agri Tourism Village, Samtlang
Pahnihna - Stephen Lalzahawma, Camp with Stars
Pathumna - Francis Lalmalsawma Sailo, Boutique Farmstay, Serchhip
Consolation Prize - i) Lalfakzuala, Wood Sculpture Art Gallery, Sairang & ii) Tlaizawng Farm Committee, Tlaizawng Huan, Lungleng South

Mizoram Travel & Tourism Excellence Award dawngtute chu :
1. Best Hotel : 1st Prize - Hotel Regency, Zarkawt, 2nd Prize - Hotel Floria, Dawrpui, 3rd Prize - Aijal Club, Tuikual
2. Best Homestay : 1st Prize - ZRS Homestay, Chawnpui, 2nd Prize - Zobawm Homestay, Zotlang, 3rd Prize - Maryland Homestay, Dawrpui Vengthar
3. Best Tour Operator : 1st Prize - Flying Christabel, Tuikual, 2nd Prize - CMS Holidays, Sikulpuikawn, 3rd Prize - Zoram Tours, Sikulpuikawn
4. Best Travel Agent : 1st Prize - D&L Travels, Chanmari, 2nd Prize - Mango Tours & Travels, Millenium Centre, Sikulpuikawn, 3rd Prize - Quality Tours & Travels, Lalbuaia Shopping Mall
5. Best Bogger / Vlogger / Youtuber : 1st Prize - Vanlallawmzuala Varte, 2nd Prize - Mizoram Outlook-Lalzawna Pachuau, 3rd Prize - P. C. Lalnunzira
6. Best Photographer (Nature & Wildlife) : 1st Prize - Zakhuma, 2nd Prize - C. Lalbiakzama, 3rd Prize - Ramthansiama Chawngthu
7. Best Photographer (Tourist destination) : 1st Prize - Zarzoliana Fanai, 2nd Prize - Amit Kumar Bal, 3rd Prize - Johnny Lalhruaitluanga
8. Best Restaurant : 1st Prize - Chopstyx, Chanmari, 2nd Prize - Groovy Bites, Chanmari, 3rd Prize - HMS Restaurant, Thuampui
9. Best Tour Guide : 1st Prize - C. Lalrinhlua, 2nd Prize - Joshua Lalchhunamawia, 3rd Prize - Robert Zotinkhuma
10. Best Social Media Handlers : 1st Prize - Mizoram Insta, 2nd Prize - Explore Mizoram, 3rd Prize - TimeToKetchup

Yuva Tourism Clubs Inter College Quiz Competition 2022 lawmman dawngte chu :
1st Prize - Institute of Advanced Studies & Education
2nd Prize - Govt. Mizoram Law College
3rd Prize - Govt. Hrangbana College

Heng lawmman hrang hrangte bakah Mizoram Sorkara Tourism Department hnuaia Guide Licence leh Tour Operator zirchhuak SEDP Beneficiaries hnenah Certificate hlan nghal a ni bawk a. World Tourism Day 2022 puala inkhawm hi Pi Zonunthari, Dy. Secretary, Tourism chuan lawmthu sawiin hun a khar a ni.