2087/2022-2023
Champhai, the 27th September, 2022: Vawiin chawhnu dar 2 khan Champhai District Level Committee on Myanmar Refugees chu an Chairman, Pu James Lalrinchhana, District Bawrhsap hovin DC Conference Hall-ah raltlan chungchanga thil pawimawh hrang hrangte ngaihtuahin an thu khawm.

Pu James Lalrinchhana chuan Champhai District chu Mizorama raltlan luh tamna ber leh hemi kaihhnawih buaipui nasa ber a nih thu sawiin, raltlante enkawl leh buaipui kawngah an mamawhte NGO leh International Agency-te nena tang hovin ngaihtuah thin a nih thu a sawi a. Security chungchangah Police leh Assam Rifles-te nena tangkawpin harsatna lian tham thleng lova tun thlenga hmalak a ni chu fakawm a tih thu a sawi a. Raltlan buaipui kawngah fimkhur taka kal a tul thu leh nakin lawka ram leh hnam tana pawi leh himlo tur a thlen loh nana ngaihtuahna zau tak senho a, infinchhuah tawn zel a tul thu a sawi bawk.

He hunah hian raltlante awmna relief camp chungchangte, Myanmar raltlante tana temporary ID siam tawh dan chungchangte, sumdawnna bungrua dan leh dan lova kalpui chungchangte, document pawimawh tak tak Aadhaar Card, Birth Certificate, Voter ID leh a dang pekchhuah kawnga dan lova thil tih awm thin ven leh dapchhuah chungchangte, in leh lo ram hralh leh tihral dan chungchangte bakah dan lova silai kawla sapel thin chungchanga hmalak ngaite sawiho a ni bawk.

Raltlante chhawmdawl kawnga agency-te hmalakna chungchang chiang zawka hriat a nih theih nan an hmalaknate DC ah thlen tura hriattir ni se tih a ni a. Village Level Committee on Myanmar Refugees-te tun aia chak zawka kalpui ni se tih a ni a. Thuneitute hriatpuina tel lova duh dan ang anga raltlan veivak thinte khuahkhirh a tul thu leh, ram buai vanga inhumhimna zawng an nih angin an duhthu ang hawi zawng zawnga an khawsak loh nan leh, ram dan leh dunte tha taka an zawm theih nana tanlak a tul thute sawiho a ni bawk.

He huna tarlan a nih dan chuan tun dinhmunah Champhai District-ah raltlan 9488 an awm mek a, camp 34 awm mekin, temporary ID mi 9488 te tan siam a ni tawh a. September ni 24, 2022 thleng khan Covid-19 vaccine first dose la 3698 (38.98%) leh second dose la 1989 (20.97%) an awm tawh a. Raltlante chhawmdawlna kawnga hmalak tawh dante leh hmanraw neih dante ngaihthlak a ni bawk.

He hunah hian SP, CMO, EE PHE & P&E, DCSO, President, Sub Headquarters YMA bakah DMS, DIPRO, Post Commander, 8th Assam Rifles, Champhai leh Zokhawthar, DLAO leh DO, DM&R, DC Office, Champhai-te an tel a ni.