2477/2022-2023
Aizawl the 30th October 2022 : Vawiin ni 30.10.2022 zing dar 9:15 am khan Imphal - Aizawl inkar Thlawhna Alliance Air Service thar hawnna video conference kaltlanga neih chu Mizoram sawrkar aiawhin Pu Robert Romawia Royte, Minister of State for Tourism Chief Secretary Video Conference Room, MINECO atangin a hmanpui a.

Alliance Air service thar hi Imphal leh Aizawl inkar ah kar khata ni nga (5) service tura ruahman a ni a, hemi rual hian Hmarchhak State hrang hrang Assam, Manipur, Arunachal Pradesh, Meghalaya ah te pawh Thlawhna service thar hi hawn nghal niin, Video Conference kaltlang hian Union Minister Civil Aviation Jyotiraditya Scindia chuan Act East Policy kalpui mek ah hmarchhak state leh Central te inkalpawh tawnna chu changtlung zawka siam chhoh zel tum a nih thu a sawi a. Ram dangte nena inkalpawhna tur international service atan pawh hmalak zel a ni, a ti.

Pu Robert Romawia chuan Mizoram chu India hmarchhak kil tawp a awm anih avangin Lei lam leh vansang lama inkal pawhna tha neih a pawimawh zual bik tih sawiin Imphal leh Aizawl inkara Alliance Air service thar hawn a ni chu lawmawm a tih thu a sawi a. Manipur leh Mizoram mipuite inkara inpawhtawnna atan te, economy bakah tourism tihhmasawnna atan a pawimawh hle dawn a ni, tiin Civil Aviation Ministry leh Alliance Air hotute chungah lawmthu a sawi a ni.

Tukin zing Alliance Air Inauguration Function ah hian Chief Minister Assam ,Manipur, Arunachal Pradesh, Meghalaya te bakah Jyotiraditya Scindia Civil Aviation Minister, Gen. VK Sig MoS Civil Aviation te, Union Law Minister Kiren Jijiju leh Civil Aviation & Alliance Air official te an tel a. Mizoram atangin Tourism Minister bakah Pu C.Lalrosanga, MP Lok Sabha leh Pu J.Lalhmingliana, Principal Consultant, Civil Aviation te chu inaugural functionah hian an tel bawk a ni.