2476/2022-2023

Champhai, the 28th October, 2022: Champhai District Football Association (CDFA) buatsaih BN Memorial 2nd Division leh Inter Branch YMA Womens' Football Tournament chu vawiin khan hmawr bawk a ni a, he hun hi Tournament Sponsor-tu Champhai North bialtu MLA Dr. ZR Thiamsanga, Vice Chairman, Health & Family Welfare Board chuan khuallian niin a hmanpui a ni.

Kharna inkhawm tawi buatsaih Pu IC Hranglura, CDFA Sr. Vice President kaihhruaiah aKhuallian Dr. ZR Thiamsanga chuan thusawiin, thalaite hmakhaw ngaia football tournament buatsaih a nih theihna tura hma latu CDFA hruaitute chu fakawm a tih thu a sawi a. Sports infrastructure tihchangtlun nana Pradhan Mantri Jan Vikas Karyakram (PMJVK) hnuaia hmalakna tur Champhai District tana hawn thar a nih tak avangin tun aia nasain Champhai District-in Sports discipline hrang hrangah hma a sawn tawh dawn a, Chhangphut field pawh tihchangtlun zel a ni dawn tih a sawi a. Champhaiah SAI training centre dah tura hmalak a nih thu a sawi bawk.

Dr. ZR Thiamsanga chuan sum harsatna avangin hna thawh theih ni rih lo mah se, Chhangphut field-a inkhel entute'n lirthei an dahna tur siam tum a nih thu sawiin, hmunhma athlawna pe phaltu Pu Damliana leh Pu Chalbawia te chu fakawm a tih thu a sawi bawk a. Khuallian chuan Champhai chu tun hma lama infiamnaa hmingtha thin a nihna chu chhawmnun thar leh a tul thu sawiin, thalai infiammite chu ruihhlo leh zuk leh hmuam laka inthiarfihlim turin a chah a, 'Champhaiah hian theihna tak tak a la awm reng a ni tih hi kan lantir leh a hun tawh a ni", a ti bawk.

BN Memorial 2nd Division & Inter Branch YMA Womens' Football Running Trophy 2022 ah hian Champion Team hian Rs 30,000/- leh Trophy an dawng a, pahnihna hian Rs 15,000/- leh trophy an dawng a ni.

Result kimchang chu Hetiang hi a ni:
1) BN Memorial 2nd Division Football Tournament
Champion : New Champhai
Runners up : Zokhawthar

2) BN Memorial Inter Branch YMA Womens'  Football Tournament
Champion : Zotlang Branch YMA
Runners up : Dinthar Branch YMA