2475/2022-2023

Champhai, the 28th October, 2022: Champhai District Chess Association (CDCA) leh Mizoram Chess Association (MCA) tangkawp buatsaih, 22nd Mizoram Open Chess Championship 2022 kharna hun vawiin tlai dar 4:30 a Vanlallawma Indoor Stadium (VANIS), Champhai Kahrawt-a neih chu District Bawrhsap Pu James Lalrinchhana chuan khuallian niin a hmanpui.

Khuallian Pu James Lalrinchhana chuan Champhai District-in Mizoram huap chess inelna lian a thleng thei leh hlawhtling taka zawh fel a ni chu lawmawm tiin, Champhai District Chess Association leh Mizoram Chess Association hruaitute fakawm a ti a. District hrang hrang atanga chess player fuankhawmte chhuanawm a tih thu sawiin, intihsiakna mai nilo inunauna tha leh inpawhtlanna tha zawk a siam ngei a beisei thu a sawi a. Mizoram Sports Council hnuaia Champhai District-a Sports Association 30 recognise zingah Champhai District Chess Association a tel thu sawiin, chess chawilar kawnga an hmalaknate fakawm a tih thu a sawi bawk.

District Bawrhsap chuan tha taka chess khel turin rilru mai nilo, taksa hriselna ngaihpawimawh tel a tul thu sawiin, khawtlang leh ram hrisel ni turin rilru leh taksa hrisel neih angai a, chess chuan hriatrengna leh rilru sawrbingna a ti chak a, thil ngaihtuah chhuah thiamna a tisang thin a ni a ti a. Chess khelhin mihringte remruat thiamna a pek thin thu pawh sawiin, rorelna leh chetlak kawngah a puih avangin chess khel thiam mi ropui tak tak an lo awm nual tawh a ni, a ti bawk a. Zirlaite'n chess khel tam se a duh thu leh rilru leh ngaihtuahna tih hriam nana hman a pawimawh thu sawiin, chess chawilar nan Champhai District-ah theihtawp chhuah tum a nih thu a sawi a; kalkhawmte chu chess chawilar nana theihtawp chhuahpuiah sawmin an kalzelna turah duhsakna a hlan a ni.

He hun hi Pu F.Lalhriatpuia, Sr. Vice President, Champhai District Chess Association (CDCA) chuan a kaihruai a. Chief Arbiter Pu Lalthazama, Asst. Secretary, Mizoram Chess Association chuan technical report pein result a puang a. Champhai District Bawrhsap hmalaknain Champhaiah kumin chhung ngeiin DC Trophy huaihawt tum a nih thu a sawi bawk. Tournament Director Pu J.Lalmuankima, President, CDCA leh Pu Jacob Chawikhuma, Secretary, CDCA ten thu an sawi bawk a ni.

22nd Mizoram Open Chess Championship 2022 hi October ni 26 atanga neih a ni a, Chess khel thiam Mizoram hmun hrang hrang atangin All India Chess Federation (AICF) hnuaia inziaklut player 47 te an tel thei a. October ni 26 atanga ni 28 chhung khan round 7 (2-3-2) hmanga inelna hi neih a ni.]Mizoram Open Chess Championship 2022 ah hian Champion Vanrammawia Ngente, Lunglei chuan trophy, certificate leh pawisafai Rs 20,000/- a dawng a, pahnihna Francis Lalhmunmawia, Mamit in certificate leh pawisafai Rs 15,000/- dawngin, pathumna H.Lalrinthanga, Lunglei chuan certificate leh pawisafai Rs 10,000/- a dawng bawk.

Heng bakah hian 4-na in pawisafai Rs 7,000/-, 5-na in pawisafai Rs 5,000/-, 6-na atanga 10-na in pawisafai Rs 1,500/- theuh dawngin, 11-na atanga 15-na te'n pawisafai Rs 1,000/- theuh an dawng a, 16-na atanga 20-na thlengin pawisafai Rs 800/- theuh an dawng a, 21-na atanga 30-na te'n pawisafai Rs. 500/- theuh an dawng bawk a. Champhai District Chess Association chuan 6-na atanga 30-na te hi pawisafai Rs 500/- theuh an hlan bawk a ni.

Special prize sem chhuah a ni bawk a. Kum 8 a upa C.Remlalnghaka, Hnahlan, Champhai District chu tel zinga player naupang ber Youngest Player-ah thlan niin, tel zinga player upa ber Most Senior Player atan kum 62 a upa Pu F.Hrangdawla, Serchhip chu thlan a ni a. Player zinga hmasawn ber Most Promising Player atan PC Rohlupuia, Champhai thlan a ni a. Player inchei mawi leh felfai ber Best Dress Player atan Lalpektluanga Tochhawng, Khawzawl thlan a ni.