3892/2022-2023
Dated Aizawl the 18th March 2023: Nimin ni 17.3.2023 tlai dar 5 ah khan Tourism Minister Pu Robert Romawia Royte in Beraw tlang a Tourist Home Annexe chu khualzinte thlennan a hawng.

Hawnna pual a inkhawm tawi buatsaih ah hian Tourism Minister chuan Tourist Home Annexe hawn theiha peih ani leh ta chu lawmawm a tih  thu a sawi a. Building tha tak mai khum 36 lai awmna Tourism Department in Berawtlang Tourist Resort a a neih belh chuan mikhual thlen kawnga harsatna kan tawh thin chu thui tak a sukiang dawn a ni tih a sawi a. He building hi Ministry of Tourism, Govt of India sum Rs 252.26 Lakh hmangin Mizoram PWD in a buliding chin an sa zo a, a furniture leh equipments te Rs 36.29 Lakhs hmangin Tourism Deptt in a siam ve thung a ni. Infrastucture Development atan building ringawt bakah a furniture leh furnishing thlenga plan thin a tul thu a sawilang bawk.

Minister chuan Tourism Department in Mizoram Annual Plan 2022-23 a a sum chan chu cheng nuai 1000 zet chauh anih laiin Mizoram Budget pawnlam atang cheng nuai 10000 chuang hmasawnna hna engmawzat thawh nan kan hmu a ni, a ti. Tourism Department a thawktute hi an tam lo nain hmasawnna sum an thawk chhuak tam a, fakloh theih an nilo a ti a, tang zel turin a fuih bawk.Tunhnaiah tourism sector-ah hmasawnna hmuh tur a tam hle a ni, a ti.

Tourism Minister chuan tun kum 4 zet chhung khan Tourism hmasawnna atana pawimawh Mizoram Responsible Tourism Policy 2020 te, Acts, Rules, Regulations leh Guidelines tul zawng zawng chu siam fel a ni ta a,tlawhchhan nghet tak nen Mizoram tourism in hmasawnna kawng a zawh thei tawh a ni, a ti.

Minister chuan hnathawh tanna lungphum tur leh thawh zawh tawhna Project hawn tur a tam avangin Office hour lova programme siam chu a finthlak a tih thu a sawi bawk. Zawngchhang chi a ni, a ti.

Minister chuan Tourism Industry chu mi zawng zawng telna leh tanrual ngaihna a nih avangin Sorkar leh  Department chu Mizoram mipui ten lo tanpui thin  turin a sawm bawk a ni.

Pu T.C Pachhunga Vice Chairman, Tourism Development Board pawh in thusawiin Minister thahnemngaihna leh remhriatna avangin Tourism Department hian a bik takin infrastructure ah hma a sawn nasa a, hun reilo te chhung in Tourism chu Mizoram sawrkar a Department pawimawh leh tangkai ber zinga mi ani ta a  ni, a ti.

He hawnna inkhawm ah hian Tourism Minister Pu Robert Romawia Royte chu Pu TC Pachhunga Vice Chairman , Tourism Development Board, Pi Manisha Saxena,Principal Secretary, Tourism leh Tourism Director Pu Saitluanga ten an tawiawm a. Tourism Department Officers leh Staff te leh sawmbik mi pawimawh te an kalkhawm a ni.