Vawiin khan Tourism Minister Pu John Rotluangliana chuan Berawtlang Tourist Complex leh Sakawrhmuituai tlang a tlawh a. Deputy Speaker, bialtu MLA ni bawk Pu R.Lalrinawma’n a tawiawm a ni.

Berawtlang Tourist Complex panna kawng hi ruahtuitla avangin a min hek nasa hle a, motor lian tana luhtlang ngam a ni lova. A panna kawng a tet bakah siam that a nih hnuah pawh min leh mai thin a nih avangin a panna tur approach road dang siam tha a hriain vawiin khan Minister chuan RIPANS peng atanga Berawtlang panna kawng a endik a. He kawng hi Tourism Department in a cheithatna tur project te duangin siamthat tlak a nih leh nih loh a enfiah a ni.

Minister Pu John Rotluangliana hian Sakawrhmuituai tlang pawh a tlawh nghal a. He tlang chhip sang lai atang hian Mamit khua leh Silchar thleng pawhin a lang thei an lo tih thin angin khaw hawina nuam tak a ni a. Aizawl atanga panna hnaite a nih bakah khawtlang hruaituten he ram hi mimal tana pe lova an lo la zuah tlat hmun a ni a. Khualzinte hip nan leh thalaite chawlh hahdamna hmun atan cheibawl a remchang dawn hle a a hriat thu leh khawthlirna hmun Aizawl Tower siam tumna a awm mek thu Tourism Minister hian a sawi a ni.

Minister hi PWD Chief Engineer C.Lalrinawma, Tourism Joint Director Pu Biakthanmawia Pautu leh officer dangte’n an tawiawm a ni.