889/2023-2024
Aizawl 22nd June 2023: New Delhi-a cham mek Tourism Minister Pu Robert Romawia Royte chuan nimin tlai khan Union Finance Secretary Dr. T.V. Somanathan chu a pisaah kawmin Manipur buaina vanga an sahimna zawnga Mizorama raltlante dinhmun leh mamawhte a sawipui . A hmain a Nodal Ministry ber Home Ministry Secretary, Ajay Kumar Bhalla leh Additional Secretary pahnihte a sawipui tawh tih sawiin, Home Ministry-in state ramri kana raltlante enkawlna turin scheme hranpa a neih loh avangin Finance Ministry chu ngaihhnathiamna Home Ministry-hnenah pe vat turin a ngen a. Union Finance Secretary chuan Mizorama Raltlan awm mekte puihna tur sum pek phalna chu Home Ministry-in an rawn rawt angin pek nghal a nih tur thu in Tourism Minister hi a thlah a ni. Tourism Minister chuan Union Home Secretary Ajay Bhalla pawh telephone- a bia in Union Finance Secretary thuchah chu a hrilh nghal a ni.
Union Finance Secretary Dr.T.V. Somanathan chuan Mizoram Chief Minister Pu Zoramthanga’n Union Finance Minister, Nirmala Sitharaman hnena a rawt angin SASCI Part-I 2023-24 atangin Cheng nuai 20000 Additional Finance Ministry-in Mizoram a pek belh tur thu Tourism Minister hi a lo hrilh a. Minister chuan SASCI sum chu release rang tura ngenin, Union Finance Secretary chuan hun rei loteah release a nih tur thu a sawi bawk.
Minister Pu Robert Romawia Royte chuan Niti Ayog-hotute pawh kawmin Mizorama Aspirational District-Mamit tihhmasawn dan tur a sawipui a. Nimin tlai khan Union Sports Secretary, Sujata Chaturvedi pawh kawmin Mizoram tana projects SAI-in a recommend tawhte sanction rang tura ngenin, SAI leh Khelo India Centres-thar tur rawtbelhna a thlen nghal a ni.
DC&MA Minister Pu Robert Romawia Royte hian nimin tlai vek khan Minority Affairs Ministry hotute kawmin Mizoram chu PMJVK scheme kalpui tha ber nia a hriat thu leh a hmuna hnathawh hrang hrangte rawn endik turin a sawm a. Sum pekchhuah tur awm ang angte pe chhuak vat turin a ngen a ni.
Pu Robert Romawia Royte bakah amah tawiawmtu MLA pahnih Dr. K. Pachhunga leh Er H.Lalzirliana te chuan Union Minister of Earth Science , Kiren Rijijju pawh Manipur buai chungchang hi khunkhan takin an sawipui a, Central sawrkarin Mizoram raltlante tanpuina a pe mai lo chu pawi an tih thute hrilhin Manipur buaina chungchangah Prime Minister chu inrawlh vat tura an duhthu te an hrilh a, NE tana Union Minister a nih ang takin a theihna zawnah tan la turin an ngen bawk a ni.
Tourism Minister hian New Delhi-a cheng Manipur Zohnahthlak Welfare hruaitute kawmna hun nei nghalin zanriah kilhona an nei bawk.
Tourism Minister hi Pu Alex .V. Chawngthu, Addl. Resident Commissioner-in a tawiawm a ni.
