890/2023-2024

Champhai, the 23rd June, 2023 : Vawiin chawhma dar 11 khan Champhai District Bawrhsap Pu James Lalrinchhana hovin Champhai District Level Committee on African Swine Fever & other Trans-boundary Animal Diseases (TADs) chu DC Conference Hall-ah an thukhawm. He hunah hian ASF chungchanga Champhai District dinhmun tlangpui, a darh zel loh nana hmalak tul leh vawk thi sawngbawl kawnga hmalak tulte ngaihtuahho a ni.

District Bawrhsap Pu James Lalrinchhana chuan African Swine Fever avangin Champhai District-ah nikumah vawk engemawzat an thih thu leh hemi avang hian cheng vaibelchhe 65 dawn hloh anga chhinchhiah a nih thu sawiin, kumina ASF rawn leng thar leh hi ngaihthah lova theihtawp chhuaha khuahkhirh tuma hmalak tlan a tul a ni, a ti a. Hrileng avanga vawk chan leh harsatna tawkte a tawrhpui takzet thu leh theihtawp chhuaha hmalak mek zel a nih thu a sawi a. District run mektu vawk hrileng African Swine Fever beihlet kawngah nasa lehzuala tanlak a ngaih thu leh thahnemngai taka thawhho a tul thu a sawi bawk.

Champhai District Bawrhsap chuan vawk hrileng khuahkhirh nana thuchhuah siam zawm lova dan lova vawk tawlh ruk ven kawngah tanlak tlan a ngaih thu a sawi a. Hrileng avanga vawk thahnem tak thi chuan sum leh pai thlenga nasa taka a nghawng theih thu sawiin, mipuite chu insumtheihna leh thuawihna nen dan zamte tha taka zawm turin a chah a. Channa nasa zawk pumpelh a nih theih nan sawrkar thuchhuah, dan kengkawhtute hmalakna leh mithiamte thurawn tha tha taka zawm fo turin mipuite a sawm nghal bawk.

He hunah hian Dr. B.Lallawmsanga, District Animal Husbandry & Veterinary Officer (DAH&VO), Member Secretary, District Level Coordination Committee on African Swine Fever chuan ASF chungchanga District dinhmun tlangpui leh hmalak dante a sawifiah a. ASF hrileng chuan Champhai District a chenchilh mek thu leh Department lama report loh vawk thi engemawzah a awm nia hriat a nih thu a tarlang a. Champhai District-ah vawk 6,000 chuang an awm mek nia chhinchhiah a nih thu sawiin, mipuite chu vawk damlo leh thi an awmin thuneitute hrilhhre zel tur leh Department thawktute tawiawm tlat turin a sawm a ni.

Thutkhawmah hian vawk thi sawngbawl leh phumbo zel dan turte ngaihtuahho a ni a. Khawpui huam chhunga vawk thi, phumna neilo tan Sub-Hqrs. YMA (SYMA) Champhai te'n khawtlang mamawhna hriaa phal taka Keifangtlang, Hmunhmeltha road kawng thlang ami ram hman hawh an phal, nikum lama hman tawh chu a tul anga ruahman leh ni se tih a ni a. Khaw hrang hrangahte VC te'n ruahmanna lo siam bawk se tih a ni a. Champhai District chhung veng leh khaw hrang hranga vawk, vawksa leh vawksa atanga thil siam phurhkual (lakluh/lakchhuah) khapna thupek chhuah ni se an ti bawk a. Hrileng do kawngah YMA, VC leh A.H & Vety Department-te tha taka an thawhho dan turte sawiho niin, thawhho dan turte duang turin A.H & Vety. Department ruat a ni a. Khawtlang mipuite hnena VC tlangau kaltlanga ASF chungchanga hriattur pawimawhte puanzar thin ni se an ti a, inzirtirna zau zawk neih dan turte sawiho a ni bawk a. Line Department dangte nena thawk hovin inzirtirna a remchan dan anga kalpui ni se an ti bawk.

A.H & Vety. Department, Champhai tarlan dan chuan ASF hrileng thawhkhatna (first wave) chu kum 2021 May ni 9 khan Champhai District Zokhawthar khuaah hmuhchhuah niin khua/veng 11 ahte a darh a, vawk 549 in an thihpui a ni. ASF thawhhnihna (second wave) chu nikum February ni 4, 2022 khan Champhai Electric Veng atanga report niin, khua/veng 41 a nghawng a, hemi avang hian vawk thi leh suat zat chu 8,454 a tling a ni.

ASF thawhthumna (third wave) hi kumin April ni 29, 2023 khan Ngur khuaah report a ni a, hemi kalzelah hian veng/khua pathum Ngur, Zote leh Champhai Vengsangte chu vawk hri lenna hmun 'infected area' ah puan a ni tawh a ni. Kumina ASF hrileng thar leh mek avang hian vawiin thleng khan Ngur, Zote leh Champhai Vengsangahte vawk thi 86 leh fimkhur thu-a suat 182 te awmin, vawk thi leh suat tawh zawng zawng zat hi 268 a tling tawh a ni.