891/2023-2024

2023 Nikir thla ni 23: Vawiin khan Lawngtlai District Task Force & Committee for Malaria Elimination chu Lawngtlai Additional Deputy Commissioner Pu Abraham Beirazi Khithie hovin Lawngtlai DC Conference Hall-ah an ṭhu khawm a. Lawngtlai District chhunga sikserh (malaria) tirem tura hma lak dan tur kawng hrang hrang an sawi ho.

Chairman Pu Abraham Beirazi Khithie chuan hriselna kawnga hma lakna hrang hrang chu health department kut chauhva dah lo va, sawrkar department dangte leh tlawmngai pawlte nen ṭang ruala hma lak a ṭul thu a sawi a. District hriselna atana hna thawh chu mi tin mawhphurhna a ni tiin, Lawngtlai District chu malaria hluarna ber district zinga mi ni mah se, ṭan rualna leh thawh hona ṭha tak nena hma lakna kal tlangin malaria chu um bo thuai theih a beisei thu a sawi.

Member Secretary, District Malaria Officer Dr S. Thaizi chuan June thla hi malaria do beihpui thlak thla, anti-malaria month atan hman ṭhin a nih thu sawiin, malaria dona kawnga hma laknaah theih tawp chhuaha thawhpui turin member kal khawmte chu a sawm a. Vector Borne Disease Control Programme-a District Consultant Pu C. Khaipotha chuan powerpoint presentation hmangin malaria chungchanga Lawngtlai District dinhmun, malaria tirem tura hma lakna leh hmachhawp awmte a sawifiah a. Hemi hnu hian health department bakah, sawrkar department hrang hrangte leh tlawmngai pawlte nen ṭang tlanga malaria tihrem leh um bo nana hma lakna tur hrang hrang sawi ho zui a ni.

District Consultant report aṭanga a lan danin, Lawngtlai District chuan Mizoramah malaria hluarna ber district dinhmun luah mekin, nikum 2022 chhung khan malaria vei leh vei loh endik 44,436 aṭangin malaria vei 4,775 hmuh an ni a, hei hi Mizorama case awm zawng zawng 10,229 aṭangin 46.68% lai a ni a. Nikum khan Lawngtlai District chhungah malaria vanga thi mi 3 an awm a ni. Kumin 2023 May thla thleng khan malaria test 13,334 awmin, malaria vei 1,637 hmuh tawh an ni a, thihpui erawh an la awm lo thung.

Vawiin meeting-ah hian malaria tirem tura zirna in, vantlang inkhawm leh media kal tlanga a tam thei ang bera inzirtirna kalpui pawimawhna te, thosi pian theihna tihbo pawimawhna te, in leh a vela thosi hlo kahtir leh damdawia chiah thosilen zar ṭhat pawimawhna te tar lan a ni a. Malaria vanga tuarna leh thihna titlem turin he'ng fimkhurna leh invenna tur hrang hrang bakah hian, a hma lama thisen endiktir leh inenkawl ṭhat a pawimawhzia te pawh tar lan a ni bawk.