892/2023-2024
Aizawl, the 23rd June 2023 : Mizoram Police leh Mizoram State AIDS Control Society(MSACS) tangkawp chuan vawiin khan Aizawl SP Conference Hall ah Ruihhlo bansan tawh te leh ruihhlo ngaite pualin inkawmhona hun ‘Interactive Session with People who Injected Drugs (PWID)’ an buatsaih.
He hunah thusawitu Pu Lalhuliana Fanai, IPS, DIGP (CID) chuan Police hna chu dan leh thupek kenkawh bakah khawtlang nun siamthat kawngah khawtlang hmalakna te puibawm a thei anga thawhpui a nih thu a sawi a. Vawiina programme pawh chutiang lam hawi a an bautsaih a nih thu sawiin Thawhtan, June ni 26 khawvel pum huapa Ruihhlo Dona Ni (International Day Against Drug Abuse and Illicit Trafficking) a nih angin, chumi denchena vawiina, he programme hi buatsaih anih thu a sawi lang bawk.
He hunah hian ruihhlo lo ti thin nghei tawh ten, ruihhlo lakah an talchhuah dan chanchin te an sawi a, ruihhlo an nghei nana an mahni puitu nia an ngaih thenkhatte sawi lang a. Chungte chu ruihhlo nghei nana OST a lo pawimawh zia te, ruihhlo bawih atanga tal chhuak turin Kohhran belin awmzia thui tak a neih dante, hun awl hnawh khah nan khawtlang leh Kohhran thil tih leh programme siama, tel tam te, mahni insiamthat nan midang tanpuina an mamawh dante an tarlang a ni.
He hunah hian Dr. Lalthlengliani, Project Director, MSACS leh Dr Christina Vanlalhriatrengi, MO, OST, Civil Hospital te pawhin thu sawina hun an nei a. Programme hi Pu Lalthakima, Addl SP CID (Crime) in kaihruaiin Pu Lalhmangaiha, Dy. SP CID (Crime) in lawmthu sawiin hun a khar a ni.
