Ni 2 awh tur 1st State Level Hodaigri Festival 2019 chu Ni 23/10/2019 khan Tuipuibari-ah tanin vawiin nilengin hman chhunzawm a ni. He Kut hi Bru Festival niin thlai thar lawmna kut a ni.

A tanna ni 23 October-ah Tourism Minister Pu Robert Romawia Royte chu Khuallian niin Mamit Bialtu MLA Er H.Lalzirliana chu Khualzahawm a ni a, Tripura MLA Pu Pramod Riang pawhin a hmanpui ve a ni. Khuallian Pu Robert Romawia Royte chuan hmun hrang hrang atanga Hodaigri Kut hmang tura pungkhawmte chu Kut Chibai bukin duhsakna a hlan a. Bru te chuan Mizo te atangin zirna, sikul leh Kristianna thlengin an dawng a, lawmna chang hria a, inpuh chhe zawng leh khawlhkham siam zawnga awm lova inzah tawn tul a tih thu a sawi a. Khawvel hmun hrang hrang thlir pawhin Kristianna leh sakhuana a hringtu an zah thiam hle hlawm a ni a ti.

Minister Pu Romawia Royte chuan Zoramah Mizoten hnam dang pawisawilo tumah an la thah ve loh laiin pawisawi lo Mizo engemaw zat erawh hnam dang kut tuara thi an awm a; a pawi takzet a ni a ti. Hmasawn nana zirna pawimawhzia sawiin Minister chuan zirna uar turin kalkhawm mipuite a chah a ni.

Khualzahawm Er H.Lalzirliana, Mamit Bialtu MLA pawhin thu sawiin khawthlang hmasawn nan Sorkarin ruahmanna thar tam tak a siam thu leh rinawm taka anmahni zawna Sorkar tawiawm turin khawtlang hruaitute leh Bru mipuite a sawm a ni. He huna Special Guest Pramod Riang, Tripura MLA pawhin helai biala Bru mipuite chu Bialtu MLA leh Mizoram Sorkar rinawm taka tawiawm turin a sawm a. A vawi khatna atana Bru Festival pawimawh Hodaigri Mizoram sorkar kaltlanga Central sorkar puihnaa hman theih a ni chu hmasawnna duhawm tak a ni a ti.

He Kut hi zai, hnam lam chi hrang hrang bakah thu benglut tak tak ngaihthlak a ni a, Mizo zaithiamte bakah Mizo Cultural Organisation (MCO) ten an hmanpui bawk a, Mamit leh W.Phaileng area-a Officers leh khawtlang hruaitute bakah Kohhran rawngbawltute an tel tha hle. He Kut hmang tur hian Mizoram district hrang hrang leh Assam leh Tripura atangin palai 300 vel an kalkhawm a, Tuipuibari leh a chhehvel mipui an pungkhawm tam hle bawk.
  
He kut hi vawiin ni 24/10/2019 hian hman chhunzawm a ni a, zanah a tiak ang.