Co-ordination Committee on Management for Aizawl City, CoMACi chu an chairman Pu Vanlalngaihsaka, Aizawl Dy. Commissioner hovin a vawikhatna atan vawiin khan DC Conference Hall-ah an thukhawm a, Aizawl khawpui chhung hmun thenkhata tui lakna tur pipe line phum dan tur leh kawng pawimawh siam dan turte bakah thil dangte an sawiho.

CoMACi hi Aizawl Traffic Management Committee in a rawt anga din a ni a. Works Department ten mipui leh ram hmasawn nana an hnathawh hrang hrangte insubuai lova mipui tana harsatna siam lo thei ang bera kawng siam leh kawng laih te, pipe phum, kawng block etc. leh thil dangte inrawn tlanna tha neiho chunga thawh dan tur an ngaihtuah thin dawn a ni.

Vawiin meeting-ah hian SIPMIU-in feeder pipeline, tui lakna hna, Chanmari atanga Laipuitlang thleng an phum tur chu sawiho a ni a. Hei hi Committee chuan kawng pawimawh leh rim taka hman mek danchahna tur anih a vang leh Krismas hunpui a thlen dawn mek avangin mipuite tana harsatna siam thei niin a hria a, hei vang hian kawngpuia hnathawh tur chu Krismas zawhah tih ni mai se, Laipuitlang hawlh chho tur pipeline phum hmasak phawt nise tiin a rel a. Vaivakawn - Hunthar junction to Chanmari West kawng November ni 4, 2019 atanga siam tur pawh mipui tana harsatna tlem thei ang ber anih beiseiin chawhma dar 10:30 atanga tlai dar 3:00 inkara thawh nise an ti bawk a ni.

CoMACi-ah hian DC chairman na hnuaiah Works Department, UD&PA, PWD, P&E, PHE, SIPMIU, I&PR, AMC, SP Aizawl, SP Traffic, DM&R leh BSNL te member an ni.