Vawiin ni 19 Oct 2019 hian Zomi Cultural Society buatsaihin Bawngkawn YMA Hall-ah Khuado Kut hman a ni a, Tourism Minister Pu Robert Romawia Royte chu khuallian niin MZP President Pu L.Ramdinliana Renthlei chu khualzahawm a ni.

Khuallian Pu Robert Romawia Royte chuan Kut hmangtu zawng zawngte chu Kut duhsakna hlanin Zofate Insuihkhawm chu Mizoram Sorkar ngaihpawimawh a nih thu leh Zofate zingah awng hrang hrang hmangtu awm mah ila insuihkhawm thiam a pawimawh a, khawvel hmun hrang hranga Zofate awm tamnaah Zo Kutpui leh Chapchar Kut te phuisui zawka hman a nih theih nan Mizoram Sorkar chuan Tourism Department kaltlangin anpuina a pe dawn a. Tunhmaa la tih ngai miah loh India ram leh Foreign ram thenkhata Zo Kutpui hmanna tur sum ruahman hi Chief Minister zahawm tak Pu Zoramthanga’n khawvel Zofate insuihkhawm a lungkhamzia tihlanna a ni a ti.

Khualzahawm Pu L.Ramdinliana Renthlei, MZP President pawhin thusawiin harsatna tam tak karah Zo Hnahthlak ten insuihkhawm kan mamawh a, i bei zel ang u a ti a. Zo Hnahthlak tupawhin Zoram leh Aizawl hi kan Jerusalem a ni a, harsatna tawkte chu MZP-in a pui zel dawn a ni a ti.

Khuado Kutah hian lam leh zai bakah items hmuhnawm leh benglut tak tak nilengin neih a ni a, tlaiah Ruai kilho a ni.