Tourism Minister Pu Robert Romawia Royte chuan vawiin khan ama office chamber-ah ‘Press Meet’ a nei a, Tourism Department hmalakna hrang hrang chungchang chanchinthar lakhawmtute a hrilh.

Minister Pu Robert Romawia Royte chuan Tourism Department-in Mizorama Remna leh Muanna hlu tak chu mumal taka tihlar (market) tum a nih thu leh a bultan nan cheng nuai 40 bitukin ‘Peace Pays Project’ siam a ni tih a sawi a. He Project thawhkhatna atan ‘Meet The Heroes : Peace Pays Inkhawmpui’ buatsaih tum a ni a. He hunah hian Mizote zalenna sual laia nunna thapa Arakan atanga China thleng kea kal hnam sipai huaisen tak takte, ram leh hnam tana hma an lo laknate pholanna Zofate chawisan tum a ni dawn a. Tun tum bikah hian China-a kalte - a hmahruaia kawng lo sattu mi 4, a thawh khatna Delegation-a kal mi 40-te leh a thawh hnihnaa kal mi 108, an vaiin mi 144-te leh an chhungte sawm vek an ni a. China-a kea kal heng hnam sipai 144 zinga la dam mi 73-te chu an mimal hnenah ngei chawimawina hlan a ni ang a, boral tawhte chu an chhungte hnenah hlan a ni thung ang.

‘Meet The Heroes : Peace Pays Inkhawmpui’ hi August ni 8, 2019 (Ningani) khian Vanapa Hall, Aizawl-ah neih tur a ni a; Mizoram Chief Minister Pu Zoramthanga chu Khuallian tura beisei niin Dy, Chief Minsiter Pu Tawnluia chu Khual zahawm a ni ang. Tlai lamah he Inkhawmpui pualin Tourist Lodge, Chaltlang-ah zanriah buatsaih a ni bawk ang.

Tourism Minister-in a sawi zel danah chuan khualzinmite nasa lehzuala hip turin ‘Anthurium Festival’ pawh hman zel tum a nih bakah hmalakna thar pakhat ‘Christmas Festival’ pawh mumal takin Tourism Department chuan a buatsaih tum a ni a ti.

Vawiina Press Meet-ah hian Commissioner, Tourism Pi Esther Lalruatkimi; Director, Tourism Pu Saitluanga leh Dy. Director, I&PR Pi Mina Zoliani ten Toursim Minister hi an tawiawm a ni.