Vawiin khan Kolasib I&PR Conference Hall ah AH & Vety Department hmalakna in Fostering Climate Resilient Upland Farming (FOCUS) hnuaia Community Animal Health Worker  (CAHW) te tan training buatsaih a ni.

He hun kaihruaitu District AH & Vety Officer Dr.Engkunga Chhangte chuan Training chu hlawk zawk leh awmze nei zawka ran vulh leh enkawl dan inzirtirna tur a nih thu sawiin FOCUS hnuaiah hian Ran chi sem lam uar a nih dawnloh thu tarlangin uluk leh thianghlim taka ran vulh inzirtirna a nih tur thu a sawi a ni.

Khuallian Dr.Lalhmingthanga, Dy.Director AH&Vety chuan FOCUS thil tum ber chu sik leh sa inthlak chho zel ah tlangram lo neih emaw ran vulha eizawngte tan ei leh bar zawnna/tharchhuahna kawnga harsatna a awmloh nana hmalak dan inzirtirna tur ani a ti a. Tlangram lo neihna hmun sawn zing lutuk vanga huan/lo ram chhuahsan taka lei hanna (soil fertility) insiam tha hmanlo te chu lei hanna/lei tha siam thei tur thlai chi in chin tira ram/lo hman tlaka siam leh te bakah Vety Science thiamna hmanga Ran vulh dan man man zawk, hrisel zawk leh thianghlim zawk bakah Sa sawngbawl dan thianghlim zawk te chu FOCUS ina a thil zirtir tum ani a ti a, kan chenna khawvel chu kan tu leh fa lo la awm zel tur te tana chenna tlaka buatsaih ani a ti.

Chawhnu lamah Training Session hman niin Pi Vanlalruati, Dr.Lalawmpuia leh Pi Lallawmzuali ten an kaihruaia, kalkhawm te hnen atangin zawhna leh chhanna hun hman bawk a ni, he hunah hian CAHW 90 vel an kalkhawm a, Pu J.Rothanga DAO, FOCUS District Programme Manager ni bawk chuan lawmthu sawiin hun a khar a ni.