Pu Lalchhandama Ralte chuan ram pum huap event hlawhtling taka kan thlen theihna turin thawhhona tha neih a tul, a ti a. Kan ram leh hnam tarlanna tur darthlalang pawimawh tak a ni dawn tih sawiin kan zavaia tang tlangin hlawhtling tak leh hneh taka he national event hi Mizoramin a thlen ngei a beisei thu a sawi a ni.
Pu Robert Romawia Royte pawhin Mizoramin National School Games Under-17 boxing a thleng tur chu lawmawm a tih thu sawiin India rama thalaite tana infiamna sang Khelo India Youth Games khelhna tur kawngka pawimawh a nih dawn avangin he event kan thlen tur hi a pawimawh hle a ni, a ti.
India ram puma school naupangte infiamnaa khaikhawmtu School Games Federation of India (SGFI) General Body meeting kum tina neih thin chuan National School Games-a event thlengtu tur a ruat thin a. Mizoramin a thlen hnuhnun ber chu kum 2007 a ni. Kumin June ni 4 leh ni 5-a SGFI General Body meeting-ah Mizoram aiawh officer pahnih intirin meeting-a tel te hian theihtawp chhuahin Mizo thalaite tuina leh thiam zawng tak Boys Under-17 boxing chu Mizoramin a thlen theih nan tan an la a, meeting hian a lo phalsak ta a ni. July ni 2 khan Education Minister hovin he Games Mizoramin a thlen tur thlir lawkna meeting neih a ni a, 65th National School Games Under 17 (Boys) atana Organising Committee chu din a ni ta a ni.
Organising Committee meeting vawikhatnaah hian Working Committee din niin Addl. Director of School Education Pu K.Laldingliana chu Chairman atan ruat a ni a, Mizoram States Sports Council Secretary Pu C.Laltlanthanga chu Co-Chairman atan ruat a ni. Sub-Committee sawmpakhat din ni bawkin chungte chu - Finance, Accomadation and Catering, Technical & Venue, Medical, Transport, Reception, Ceremonial & Sound, Information & Publicity, Water Supply, Power & Electricity leh Security Sub-Committee te an ni a. Sub-Committee tin Office Bearers turte Organising Committee hian a ruat fel nghal a, August thla chhunga thu ngei tura beisei niin an sum mamawh tur ruahmanna te September ni 15 hmain thehlut tura beisei an ni bawk.
65th National School Games, Boxing khelhna tur hmun atan R.Dengthuama Indoor Stadium, Mualpui chu Organising Committee hian a ruat a. A hun atan November 19 atanga 22 chu meeting-ah hian rawt niin, an rawtna hi School Games Federation of India-ah thlen leh tur a ni.
