Tukin zing khan Tourism Minister Pu John Rotluangliana chuan Tourism Department hmalakna thenkhatte a hmun ah kalin hnathawh chin te a en, a hmun ah hian Department hotute nen chak zawka hma lak dan an sawiho bawk. Tourism Minister hi Deputy Speaker leh Aizawl East I bialtu MLA ni bawk Pu R. Lalrinawma’n a tawiawm a ni.

Pu John Rotluangliana hian Turial Airfield-a Aerosports Project sak mek, Bung Bangla-a State Institute of Hotel Management (SIHM) sak mek leh Beraw Tlanga Tourist Lodge leh Convention Centre sak mek te chu a tlawh. Tourism Minister chuan Hmarchhak bikah Mizoram-in Aerosports lamah hma eng tha tak a neih ngei a rin thusawiin State Institute of Hotel Management a taka tan anih hunah chuan tourism leh kaihhnawih zirna lamah rahbi thar a siam thei dawn a ni a ti.

Turial Airfield-a Aerosports Project hnuaiah hian hanger leh girls hostel te sak a ni tawh a, SIHM hmunah hian Institute building chhawng thum chu peihfel tep a ni a, mipa 42 awm theihna Boys Hostel leh hmeichhia 20 awm theihna Girls Hostel te chu sak zawh an ni tawh. Beraw Tlanga Tourist Lodge thar(room 18 awmna tur) leh Convention Centre te chu sak mek an ni bawk.

Minister hi Tourism Director Pu Vabeiha Hlychho, Joint Director Pu Biakthanmawia, PWD Engineer te leh Mizoram Aerosports Association hruaituten an tawiawm a ni.