Pukpui khua chuan January 18, 2014 (Inrinni) khan Government Middle School-I ah Sawrkar thar lawmna hun a buatsaih a. He hunah hian Minister Pu P.C. Lalthanliana, LAD, Horticulture, etc.,changtu chu khuallian ni in Pu Chalrosanga, MLA, Lunglei West bialtu chu khualzahawm ah hman a ni.

Sawrkar tharlawmna huna thusawitu Minister Pu P.C. Lalthanliana chuan sawrkar chu mipui te ta, mipui vanga awm leh mipui hamthat nan a hnathawktu a ni a ti a. Sawrkar thar ah pawh Mizoram kuthnathawktu te chawikanna programme lianber New Landuse Policy(NLUP) sawrkar hmasa atang pawha lo kalpui tawh leh la chhunzawm mek zel chu dah pawimawh ber a ni ang a ti a. NLUP tanpuina dawngtu zingah hlawhtling taka kalpui mek tam tak an awm laiin tanpuina dawng tawh si a nihna anga tura kalpui lo te an lo awm a nih chuan chung ho chu tanpuina pek chhunzawm an ni tawh dawn lo a ni a ti a. Kawlphetha siamchhuah kawngah te sawrkarin chak takin hma a la mek a. Leihnuai hausakna haihchhuah kawnga hmalak mek te leh relkawng siam tura ruahmanna kalpui mek te pawh a awm a ni a ti a. Heng hmachhawp te hi a hlawhtlinna hmuh thuai a nih theihnan a hmalak mek a nih lai hian sawrkar chuan mipui te thlawpna leh phungbawmna a mamawh a ni a ti.

Thusawitu dang Pu Chalrosanga, MLA thar pawh in ram rorelna a tel ve thei tura thlan tlin a ni chu a thinlung taka a lawm thu a sawi hmasa in thlang tlingtu a bial mipui te leh Mizoram hmasawn nan a theih tawp chhuah a hna a thawh tur thu a sawi a ni.